ជីវិតកម្សាន្ដ

ជីវប្រវត្តិតារាសម្ដែងកូរ៉េ Lee Sun Kyun និងស្នាដៃបន្សល់ទុកចុងក្រោយ មុនលាចាកលោក

បានផុស

១ year មុន

នៅ

ថ្ងៃព្រហស្បតិ៍ ២៨ ធ្នូ ២០២៣

ដោយ

ជាដំណឹងមួយ ដ៏សោកសៅបំផុតក្នុងឧស្សាហកម្មកម្សាន្តរបស់កូរ៉េខាងត្បូង កាលពីពេលថ្មីៗនេះ មានសេចក្តីរាយការណ៍មកថា តារាសម្តែងប្រុស Lee Sun Kyun ត្រូវបានគេប្រទះឃើញដេកស្លាប់ក្នុងរថយន្តនៅអាយុ ៤៨ ឆ្នាំ ពេលកំពុងស៊ើបអង្កេតគ្រឿងញៀន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះយ៉ាងណាក៏ដោយ មុនពេលលោកលាចាកលោក Lee Sun Kyun បានបន្សល់ទុកនូវស្នាដៃជាច្រើនក្នុងវិស័យភាពយន្តកូរ៉េ។ លើសពីនេះ សូម្បីជីវប្រវត្តិរបស់តារាសម្ដែងរូបនេះក៏ត្រូវបាគេទម្លាយជាសាធារណៈផងដែរ ដ្បិតថាលោកហាក់មិនមានវត្តមានលើបណ្ដាញសង្គមណាមួយឡើយ។ ខុសពីតារាល្បីៗផ្សេងទៀត គាត់ចូលចិត្តចំណាយពេលជាមួយគ្រួសារ និងខ្លួនគាត់ពេលមិនធ្វើការនៅក្នុងអាជីវកម្មភាពយន្ត។ លើសពីនេះ Lee Sun Kyun មិនចូលចិត្តការបង្ហាញនូវរឿងរ៉ាវដ៏រសើបណាមួយឡើយ។

Lee Sun Kyun កើតនៅថ្ងៃទី ០២ ខែមីនា ឆ្នាំ ១៩៧៥ នៅទីក្រុងសេអ៊ូល ប្រទេសកូរ៉េខាងត្បូង។ គាត់បានបញ្ចប់ការសិក្សាពីសាកលវិទ្យាល័យសិល្បៈជាតិកូរ៉េក្នុងឆ្នាំ ១៩៩៤ ជាមួយនឹង BFA (បរិញ្ញាបត្រវិចិត្រសិល្បៈ) ផ្នែកសម្ដែង។ក្រោយមកលោកចូលប្រឡូកក្នុងវិស័យសិល្បៈជាលើកដំបូងក្នុងឆ្នាំ ២០០១ ក្នុងតួនាទីសម្ដែងក្នុងកម្មវិធី The Rocky Horror Show បន្ទាប់មកគាត់បានដើរតួជាតួតូចៗជាច្រើនឆ្នាំ។ រហូតដល់មានភាពល្បីល្បាញក្នុងឆ្នាំ ២០០៧ ពីស៊េរី White Tower និងស៊េរីដ៏ពេញនិយមនៅសម័យនោះគឺ រឿង Coffee Prince ។

នៅក្នុងឆ្នាំ ២០១២ Lee Sun Kyun បានទទួលជោគជ័យក្នុងការសម្តែងក្នុងខ្សែភាពយន្តចំនួន ២ រឿង Helpless និង All About My Wife ហើយក្នុងឆ្នាំ ២០១៣ គាត់បានសម្តែងជាតួឯកក្នុងរឿង “A Hard Day” ជាមួយភរិយា Jeon Hye-jin ដែលបានចាក់បញ្ចាំងជាលើកដំបូងនៅផ្នែក Directors’ Fortnight នៃមហោស្រពភាពយន្ត Cannes ។

ក្នុងឆ្នាំ ២០១៨ Lee Sun Kyun បានសម្តែងក្នុងរឿង My Mister ទល់នឹងតារាវ័យក្មេង IU ដែលទទួលបានការវាយតម្លៃល្អខ្លាំងមិនធ្លាប់មាន។ ក្នុងឆ្នាំដដែលនោះ លោកក៏បានសម្ដែងក្នុងរឿង Take Point មុនពេលត្រូវបានគេសង្ស័យថា ប្រើប្រាស់គ្រឿងញៀនក្នុងកន្លែងកម្សាន្តមួយកាលពីខែតុលា។

ស្នាដៃសម្តែងរបស់ Lee Sun Kyun ត្រូវបានអ្នកទស្សនាបញ្ចេញមតិមានទាំងសរសើរនិងអ្នករិះគន់។ លោកបានសម្តែងជាច្រើនរឿងក្នុងនោះមានទាំងរឿងកំប្លែង តួសម្តែង និងតួឯក។ បុរសរូបនេះអាចចូលតួបានយ៉ាងស៊ីជម្រៅ និងបង្ហាញអារម្មណ៍ពិតប្រាកដ។ នេះហើយបានធ្វើឲ្យគាត់ក្លាយជាតារាសម្ដែងដ៏ពេញនិយមបំផុតក្នុងវិស័យកម្សាន្តកូរ៉េខាងត្បូងនិងសល់ទ្រព្យសម្បត្តិសរុបប្រហែល ៥ លានដុល្លារគិតត្រឹមខែវិច្ឆិកា ឆ្នាំ ២០២៣ ហើយប្រភពចំណូលចម្បងរបស់គាត់គឺអាជីពសម្ដែងទាំងស្រុង។

យ៉ាងណាមិញ ចាប់តាំងពីសម្ដែងលើកដំបូងរហូតបញ្ចប់ជីវិតនៅថ្ងៃទី២៧ ខែធ្នូ ឆ្នាំ២០២៣នេះ Lee Sun Kyun បានបន្សល់ទុកនូវស្នាដៃសរុបចំនួន១៤រឿង សុទ្ធសឹងតែជាភាពយន្តដែលទទួលបានការចូលទស្សនានិងវាយតម្លៃខ្ពស់បំផុត។ ក្នុងនោះមានភាពយន្តចុងក្រោយមានចំណងជើងថា Parasite ដែលលោកដើរតួជាឪពុកអ្នកមាន បានឈ្នះពានរង្វាន់ Oscar នាពេលថ្មីៗនេះ។ ចំណែកឯខ្សែភាពយន្តចុងក្រោយបង្អស់ដែលទើបតែចេញមានចំណងជើងថា Sleep បង្ហាញនៅមហោស្រពភាពយន្ត Cannes ឆ្នាំ ២០២៣៕