ដេត ស្រីនាឌ សុំឱកាសដើម្បីបានបង្ហាញឆន្ទៈជាថ្មី ក្នុងវិស័យបវរកញ្ញា និងសន្យាថា ដួលកន្លែងណាក្រោកកន្លែងនោះ

ក្រោយចេញមុខបកស្រាយម្តងហើយម្តងទៀត ដើម្បីសុំឱ្យមានការយោគយល់ពីសំណាក់មហាជន ជុំវិញរឿងរ៉ាវនៃការធ្វើពហិកាមិនចូលរួមប្រកួតកម្មវិធី Miss Planet Internation 2024 កាលពីខែវិច្ឆិកាកន្លងទៅ ដេត ស្រីនាឌ បានបង្ហាញឆន្ទៈខ្លួនជាថ្មីម្តងទៀត ចំពោះវិស័យបវរកញ្ញា បើទោះបីសាធារណជនមិនទាន់អនុគ្រោះដល់ខ្លួនក៏ដោយ។

៣ថ្ងៃមុន អតីតបេក្ខភាពបវរកញ្ញាកម្មវិធី MPI 2024 រូបនេះ បានស្នើសុំចិត្តមហាជន ឱ្យផ្តល់ឱកាសដល់ខ្លួនបានបង្ហាញនូវឆន្ទៈក្នុងវិស័យបវរកញ្ញាជាថ្មី ដោយសន្យាថា “ដួលកន្លែងណា នឹងខំប្រឹងក្រោកឈរកន្លែងនោះ“។

ដេត ស្រីនាឌ បានរៀបរាប់ទៀតថា ថ្វីបើនាងមិនអាចប្តូរការគិតរបស់សាធារណជនចំពោះខ្លួន ក្នុងបញ្ហាដែលបានកើតឡើងកន្លងមកបានក៏ដោយ ប៉ុន្តែនាងសម្រេចចិត្តថា ឆ្នាំថ្មី ឆ្នាំ២០២៥ នាងនឹងជ្រើសរើសបង្ហាញឆន្ទៈរបស់ខ្លួន ក្នុងកម្មវិធី Miss ណាមួយ ដើម្បីចូលប្រកួត ហើយនឹងខិតខំបញ្ចេញឱ្យអស់​ពីសមត្ថភាព។

គួររំលឹកថា ដេត ស្រីនាឌ ជាអតីតបេក្ខភាពបវរកញ្ញាមួយរូប ដែលធ្លាប់បោះបង់ការប្រកួត ២លើកមកហើយ ដោយលើកទី១ កាលពីឆ្នាំ២០១៩ ក្នុងកម្មវិធី Miss Grand International 2019 ដោយមូលហេតុក្រុមគ្រួសារបារម្ភពីសុវត្ថិភាព និងលើកទី២ ក្នុងវគ្គផ្តាច់ព្រ័ត្រនៃកម្មវិធី Miss Planet International 2024 ដោយលើកមូលហេតុរងការមិនឱ្យតម្លៃ និងសម្ពាធ។

យ៉ាងណា ការដកខ្លួននៅលើកទី២នេះ ជាការសម្រេចចិត្តធ្វើពហិកាមិនចូលរួមប្រកួតលើទឹកដីកំណើតតែម្តង ជាហេតុធ្វើឱ្យមហាជនបង្ហាញការមិនពេញចិត្តជាខ្លាំង ដែលបវរកញ្ញារូបនេះ មិនមានឆន្ទៈតំណាងប្រទេសជាតិ ដោយសម្រេចដកខ្លួនភ្លាមៗតែម្តង។ យ៉ាងណាមិញ ក្រោយរងការរិះគន់ពីមហាជន បើបីជានាងបានខំប្រឹងបកស្រាយជាច្រើនលើកច្រើនសារក៏ដោយ មហាជននៅតែសម្តែងការពេញចិត្តដដែល និងស្នើឱ្យនាងឈប់មានវត្តមានក្នុងការប្រកួតគ្រប់កម្មវិធីប្រកួតសម្រស់បន្តទៀត៕