ជីវិតកម្សាន្ដ

ណា សាឌី ទម្លាយរឿងពិតមួយក្នុងសង្គមពីសន្តានមនុស្សខំប្រឹងអួតសម្ញែងតែរបស់ទ្រព្យអ្នកដទៃ

បានផុស

១ year មុន

នៅ

ថ្ងៃសុក្រ ៣១ មករា ២០២៥

ដោយ

តារាសម្ដែង និងពិធីការិនីកូនកាត់ កញ្ញា ណា សាឌី បង្ហាញការហួសចិត្តមួយចំពោះសកម្មភាពរបស់បុគ្គលនៅក្នុងសង្គមមួយចំនួនដែលចូលចិត្តការបង្អួត ឬ សម្ញែងអ្វីដែលពុំមែនជារបស់ខ្លួន ពោលគឺខំ ប្រឹងអួតសម្ញែងតែរបស់ទ្រព្យអ្នកដទៃ ដើម្បីឲ្យគេមើលឃើញថាខ្លួនហ៊ឺហា មានរបស់ទំនើបៗ ប្រើប្រាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្រីស្អាត ណា សាឌី បានឲ្យដឹងថា ប្រឹងណាស់ម្ងៃៗ ប្រឹងអួតតែរបស់គេ។ នាងថា ត្រូវបែងចែកឲ្យដាច់រវាងការដើរអែបអបគេ ស៊ីពែរគេ និងរវាងគោរពគេ ព្រោះថាមនុស្សមួយចំនួនធំបែងចែកអត់ដាច់ទេ ដោយសារតែមនុស្សដែលដើរអែបអបគេ ស៊ីពែរគេ ចរិតឫកពាពួកគាត់ឡូយឆាយខ្លាំងណាស់។

កញ្ញា ណា សាឌី បាននិយាយទៀតថា អ្នកខ្លះឃើញផ្ទះគេធំៗ ម្ហូបអាហារល្អៗ និងឡានទំនើបៗ ឬ ស្រាថ្លៃៗ គឺចាប់ផ្ដើមថតផុសអួតឲ្យគេឃើញថាជារបស់ខ្លួន ប៉ុន្តែធាតុពិតគឺបុគ្គលនោះមិនមានអ្វីទាំងអស់….។ អ្វីដែលកាន់តែហួសចិត្តទៀតនោះ មនុស្សប្រភេទនេះថែមទាំងមើលងាល ឬ សម្លក់សម្លឹងមើលគេលើក្រោមទៀតផង។

ណា សាឌី បានបន្ថែមថា តើធ្វើបែបនេះបានអ្វីមកវិញ ព្រោះជាការស្រមើស្រមៃប៉ុណ្ណោះ ហើយបើអាចឈប់បានឈប់ទៅរឿងចរិត និងទម្លាប់បែបហ្នឹង ២០២៥ ហើយ ហើយនាងគិតថា បើសិនរាប់អានមនុស្សនៅជុំវិញខ្លួនបានកាន់តែច្រើននោះជារឿងល្អណាស់។

ជាមួយគ្នានេះមានការលើកឡើងពីអ្នកគាំទ្រដែរថា កើតជាមនុស្សនៅក្នុងបរិបថសង្គមមួយនេះគឺមិនរស់នៅក្នុងក្តីសុបិនរបស់អ្នកដទៃឡើយ ព្រោះមុជក៏មិនបានជ្រៅទៅក៏មិនបានឆ្ងាយដែរ ស្ងាត់ៗ គេសល់ផ្ទះ ស្ងាត់ៗ គេសល់ឡាន ស្ងាត់គេសល់ដី យើងវិញស្ងាត់ៗ សល់បំណុលជុំទិស។

សូមជម្រាបដែរថា តារាស្រីកញ្ញា ណា សាឌី គឺជាកូនកាត់ដែលមានម្តាយជាជនជាតិខ្មែរ ចំណែកឯឪពុកជាជនជាតិថៃ ហើយនាងក៏ជាពិធីការិនី និងតារាសម្ដែង កំពុងទទួលបានការគាំទ្រច្រើនពីសំណាក់មហាជន ពិសេសបើនិយាយពីការងារវិញពិតជាមានភាពមមាញឹកច្រើន៕

អត្ថបទ ៖ ចាន់រ៉ា