ភ្នែករបស់តួអង្គ យ៉ាងគួរ ជំនាន់ឆ្នាំ៩៥ វិះនឹងពិការ បើព្យាបាលមិនទាន់ពេល

នៅក្នុងព្រឹត្តិការណ៍មួយកាលពីពេលថ្មីៗនេះ តារាសម្តែងហុងកុង Louis Koo មិនស្ទាក់ស្ទើរក្នុងការចែករំលែកដោយត្រង់ថា retina (ជាស្រទាប់ងាយទទួលពន្លឺនៅខាងក្រោយភ្នែក) នៃភ្នែកខាងស្តាំរបស់គាត់មានរន្ធពីរ ដែលមើលឃើញផ្សែងឬស្នាមខ្មៅនៅក្នុងភ្នែក ដោយត្រូវតែទទួលការវះកាត់ជាបន្ទាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អតីតតួអង្គយ៉ាងគួរ ជំនាន់ឆ្នាំ១១៩៥ រូបនេះបាននិយាយបន្តទៀតថា ក្រោយ​ពេល​វះកាត់រួចរាល់ ក្រុមគ្រូពេទ្យតម្រូវឲ្យ​លោកសម្រាក​មួយ​សប្តាហ៍ពេញ ព្រមទាំងពាក់ Contact Lenses និង​មិន​អាចជិះយន្តហោះក្នុង​កំឡុង​ពេល​នេះបានដាច់ខាត។

យោងតាម ​​163 អ្នកជំនាញវេជ្ជសាស្ត្របាននិយាយថា នេះគឺជាបញ្ហាធ្ងន់ធ្ងរ ប្រសិនបើមិនព្យាបាលភ្លាមៗទេ តារាសម្តែងហុងកុង អាចងងឹតភ្នែកបាន។ ហេតុផលមួយក្នុងចំណោមហេតុផលសម្រាប់ស្ថានភាពគួរឲ្យព្រួយបារម្ភរបស់គាត់នាពេលបច្ចុប្បន្ននេះ ត្រូវគេជឿថា ជាឧបទ្ទវហេតុកាលពីកំឡុងឆ្នាំ ២០១៧។

រម្លឹកទៅកាន់កាលណោះ លោក Louis Koo កំពុង​ថត​កុន ប៉ុន្តែ​ត្រូវ​របួស​ភ្នែក​ស្តាំ និង​ត្រូវ​ដេរ ៨ ថ្នេរ។ បន្ទាប់មក តារាសម្តែងជើងចាស់បានព្រងើយកន្តើយចំពោះមុខរបួសដែលមិនបានព្យាបាលទាន់ពេលវេលា ហើយបែរជាហោះទៅប្រទេសនូវែលសេឡង់ ដើម្បីបន្តការថតភាពយន្តទៅវិញ។

ប្រធានសមាគមសិល្បករហុងកុងរូបនេះ ក៏បាននិយាយដោយត្រង់ពីទស្សនៈការងារផ្ទាល់ខ្លួននៅលើប្រព័ន្ធផ្សព្វផ្សាយសង្គមថា «គោលការណ៍របស់ខ្ញុំសម្រាប់ដោះស្រាយការងារគឺ៖ កុំបណ្តោយឲ្យការងារមានគំនរ កុំបង្អង់យូរ។ សហការីរបស់ខ្ញុំ និងខ្ញុំនឹងរាយបញ្ជីកិច្ចការដែលត្រូវធ្វើ រៀបចំវាតាមអាទិភាព ដើម្បីបំពេញឲ្យមានប្រសិទ្ធភាពបំផុត»។

នេះមិនមែនជាលើកទីមួយទេ ដែល Louis Koo មានបញ្ហាសុខភាព។ កាលពីឆ្នាំ ២០១៨ លោកបានទម្លាយថា ខ្លួនមានឆ្អឹងខ្នងមាត់ស្បូនរអិលគម្លាត ១សង់ទីម៉ែត្រ សង្កត់សរសៃប្រសាទ បណ្តាលឲ្យម្រាមដៃទាំង ១០ ខ្វិន។ គាត់ត្រូវទៅសហរដ្ឋអាមេរិកដើម្បីធ្វើការវះកាត់ ដើម្បីជំនួសឆ្អឹងកងស្ថិតនៅ C5 និង C6 (វាមានទីតាំងនៅពីលើស្មា ហើយទ្រទ្រង់ និងភ្ជាប់លលាដ៍ក្បាល)។

តារាសម្តែង Louis Koo បានធ្វើសកម្មភាពក្នុងវិស័យកម្សាន្តអស់រយៈពេល ៣០ ឆ្នាំមកហើយ ហើយមានភាពល្បីល្បាញនៅលើប៉ុស្តិ៍ទូរទស្សន៍ TVB ជាច្រើន។ លោកក៏ជាសិល្បករហុងកុងដែលបានសម្តែងក្នុងខ្សែភាពយន្តច្រើនជាងគេ រហូតគេដាក់រហ័សនាមថា ស្ដេចកម្សាន្តភាពយន្តហុងកុង។ យ៉ាងណា នាប៉ុន្មានឆ្នាំចុងក្រោយនេះ តារាប្រុសបានប្រើប្រាស់លុយផ្ទាល់ខ្លួន ហើយបានអំពាវនាវឲ្យវិនិយោគបង្កើតការងារឲ្យបុគ្គលិក ខណៈពេលដែលផលិតកម្មភាពយន្តកំពុងស្ថិតក្នុងវិបត្តិ៕

អត្ថបទ៖ សាង ស្រីល័ក្ខ

ចុចអាន៖ជោគជ័យលើអាជីពសម្ដែងមិនអស់ចិត្ត Park Bo Gum នៅឆ្លៀតរកលុយពីអចលនទ្រព្យ