តារាម៉ូដែលចិនម្នាក់ទៀត បាត់ខ្លួនក្នុងតំបន់ជួញដូរមនុស្ស ថៃ-មីយ៉ាន់ម៉ា

សារព័ត៌មាន Bj News បានរាយការណ៍កាលពីថ្ងៃព្រហស្បតិ៍ថា បងស្រីរបស់តារាម៉ូដែលជនជាតិចិន Zhong Hao Bin បានពន្យល់នៅលើប្រព័ន្ធផ្សព្វផ្សាយសង្គមថា កាលពីដើមខែមិថុនាអតីតនិយោជកម្នាក់ បានសុំឲ្យប្អូនគាត់ធ្វើដំណើរទៅប្រទេសថៃ ដើម្បីថតរូបសម្រាប់ទស្សនាវដ្តីមួយ។ ដោយសារតែគ្រួសារកំពុងមានតម្រូវការផ្នែកហិរញ្ញវត្ថុ តារាប្រុសបានទទួលយកសំណើរដោយមិនស្ទាក់ស្ទើរ។ នៅ​ថ្ងៃ​ទី ៨ ខែ​មិថុនា លោក​បាន​ឡើង​យន្តហោះ​ពី Guangzhou ទៅ​អាកាសយានដ្ឋាន​អន្តរជាតិ Don Muang ក្នុង​ទីក្រុង​បាងកកភ្លាមៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមបងស្រីតារាម៉ូដែល បន្ទាប់ពីមកដល់ទីក្រុងបាងកក លោកត្រូវបាននាំទៅខេត្ត Tak ជាខេត្តភាគខាងជើងប្រទេសថៃ ជាកន្លែងដែលគាត់បានបាត់ខ្លួនជាបន្តបន្ទាប់។ នៅថ្ងៃទី ១៣ ខែមិថុនា Zhong អាចទាក់ទងប្អូនស្រីរបស់គាត់បានហើយបង្ហាញថាគាត់ត្រូវបានគេបោកបញ្ឆោតឲ្យធ្វើដំណើរទៅប្រទេសមីយ៉ាន់ម៉ា។ ទោះយ៉ាងណាក៏ដោយ គាត់មិនអាចផ្តល់ឲ្យនាងនូវទីតាំងពិតប្រាកដនៅពេលនោះទេ។

ប៉ូលិសក្វាងចូវបានបញ្ជាក់ថា ពួកគេបានទទួលរបាយការណ៍ពីបងស្រីរបស់ Zhong ហើយបច្ចុប្បន្នកំពុងស៊ើបអង្កេតករណីនេះ។

បងស្រីរបស់ Zhong បានចែករំលែកថា ប្អូនប្រុសនាងបានធ្វើជាតារាម៉ូដែលអស់រយៈពេលជាង ៤ឆ្នាំ ហើយបានក្លាយជាជំនួយហិរញ្ញវត្ថុដ៏សំខាន់របស់គ្រួសារ បន្ទាប់ពីការស្លាប់របស់ឪពុកពួកគេ។ នាង​សង្ឃឹម​ថា ការ​ចែក​រំលែក​ព័ត៌មាន​ទូលំទូលាយ​នឹង​ជួយ​នាំ​ប្អូន​ប្រុស​​ត្រឡប់​មក​ផ្ទះ​វិញ​ក្នុង​ពេល​ឆាប់​ៗ​នេះ។

អ្នកប្រើប្រាស់ Weibo ជាច្រើនបានធ្វើការប្រៀបធៀបរវាងករណីរបស់ Zhong និងរឿងរបស់តារាសម្តែងចិន Wang Xing ដែលត្រូវបានបោកបញ្ឆោតឲ្យទៅប្រទេសថៃ ហើយបានបាត់ខ្លួនជាបន្តបន្ទាប់។ កាលពីខែមករា មិត្តស្រីរបស់ Wang បានបង្ហោះសារអង្វរសុំជំនួយនៅលើ Weibo ដែលនាំទៅដល់ការជួយសង្គ្រោះរបស់គាត់។

ក្រោយមកអាជ្ញាធរថៃបានកំណត់ថា Wang គឺជាជនរងគ្រោះនៃការជួញដូរមនុស្ស ហើយត្រូវបានឃុំខ្លួននៅប្រទេសមីយ៉ាន់ម៉ាសម្រាប់ការបណ្តុះបណ្តាលផ្នែកឆបោក។ មនុស្សប្រហែល ៥០ នាក់ផ្សេងទៀតដែលជាប់នៅក្នុងអគារតែមួយជាមួយគាត់ក៏ត្រូវបានដោះលែងផងដែរ។

បន្ទាប់ពីករណីរបស់លោក Wang តារាល្បីរបស់ចិនជាច្រើននាក់បានចែករំលែកបទពិសោធន៍ផ្ទាល់ខ្លួនរបស់ពួកគេ ដោយបង្ហាញថា ពួកគេបានទទួលការស្នើឲ្យចេញក្រៅប្រទេសស្រដៀងគ្នាដែរ ប៉ុន្តែមានសំណាងគ្រប់គ្រាន់ដើម្បីរក្សាការប្រុងប្រយ័ត្ន និងចៀសវាងការធ្លាក់ចូលទៅក្នុងកណ្តាប់ដៃអ្នកជួញដូរ។

មេធាវីក្នុងប្រទេសថៃបានកត់សម្គាល់ថា ឈ្មួញជួញដូរលែងកំណត់គោលដៅជាចម្បងលើពលករធ្វើដោយដៃទៀតហើយ ប៉ុន្តែកំពុងផ្តោតកាន់តែខ្លាំងឡើងលើអ្នកជំនាញ ដូចជាតារាសម្តែង និងវិស្វករជាដើម៕

អត្ថបទ៖ សាង ស្រីល័ក្ខ

ចុចអាន៖Meng Ziyi ទម្លាយថា ស្អាត​ពេកក៏មានកំហុស គេរើសអើងថាមិនសក្តិសមជាតួសម្ដែង