រឿងជួយផ្តាច់បំណុលគ្រួសារកងទ័ព PeyPey Dy ថាមិនពិត តែក៏សង្ឃឹមអាចធ្វើបាន អាស្រ័យលើទឹកចិត្តសប្បុរសជន

រឿងសារបង្ហោះ និងចែករំលែកពេញបណ្តាញទំនាក់ទំនងសង្គម ចំពោះពត៌មានដែលសរសេរថា PeyPey Dy បានយកថវិកាទៅជួយផ្តាច់បំណុលធនាគាររបស់គ្រួសារវីរៈកងទ័ពនោះ សាមុីខ្លួនចេញមកអះអាងថា មិនមែនជាការពិតទេ តែលោកក៏សង្ឃឹមថា អាចនឹងកើតឡើងពីកម្លាំងសាមគ្គីនាពេលខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈខ្លឹមសារខាងលើនេះ គូសបញ្ជាក់ថា កញ្ចប់ថវិកាដែល PeyPey Dy ទទួលបានពីសប្បុរជនគ្រប់ទិសទី ពុំបានប្រើប្រាស់លើការផ្តាច់បំណុលធនាគារគ្រួសារវីរៈកងទ័ពនោះឡើយខណៈពេលនេះ ពោល គឺកញ្ចប់ថវិកាទាំងនោះ បានប្រើសម្រាប់ផ្តត់ផ្គង់ស្បៀងអាហារ និងសម្ភារៈសម្រាប់ជនភៀសសឹកកម្ពុជាប៉ុណ្ណោះ។

តែទោះជាបែបនេះ លោកក៏សង្ឃឹមថា អាចធ្វើរឿងនេះជូនគ្រួសារកងទ័ពពលី បើសិនណាសប្បុរសជនមានទឹកចិត្តចង់ជួយពិតមែន។ លោកថា “ខ្ញុំក៏សង្ឃឹមថាវានឹងអាចកើតឡើងពីកម្លាំងសាមគ្គីនៅពេលខាងមុខណាមួយ
ជាក់ស្តែងពួកយើងកំពុងរៀបចំស្បៀងជូនជនភៀសសឹក កងទ័ពជួរមុខ ដែលមានរបួស និងគ្រួសារសពវីរៈជនទៅតាមសមត្ថភាព និងចំនួនទឹកប្រាក់ដែលទទួលបាន”។

លោកបញ្ជាក់ទៀតថា ក្នុងនោះដែរ លោកក៏បានត្រៀមកញ្ចប់ថវិការជូនពួកគាត់ដូចគ្នា ព្រមនិងប្រកាសថា លោកនៅតែទទួលការបរិច្ចាកផ្សេងៗ ដើម្បីបន្តដំណើរនៃមហាទឹកចិត្តខ្មែរឱ្យមានរយៈពេលវែងតាមដែលអាចធ្វើបាន។

គួររំលឹកថា តាមរយៈសកម្មភាពគៀងគរថវិកាសម្រាប់ជនភៀសសឹកកម្ពុជា កំឡុងពេលជម្លោះព្រំដែនកម្ពុជា-ថៃ ប៉ុន្មានថ្ងៃមកនេះ សង្កេតឃើញថា អ្នកផលិតមាតិកាល្បីឈ្មោះរូបនេះ ហាក់ទទួលបានការចូលរួមពីសប្បុរសជនច្រើនបំផុត ដែលទទួលបានសរុបប្រមាណ ៨០មុឺនដុល្លារ ខណៈក្នុងនោះ រួមបញ្ចូលជាមួយថវិកាផ្ទាល់ខ្លួនលោក ១មុឺនដុល្លារផងដែរ៕