ព័ត៌មានអន្ដរជាតិ

ហ៊ានខ្លាំង! ចោរមួយក្រុមចូលលួចគ្រឿងអលង្ការដ៏មានតម្លៃរបស់រាជវង្សបារាំង ពីសារមន្ទីរ Louvre ក្នុងទីក្រុងប៉ារីស

បានផុស

៦ ខែ មុន

នៅ

ថ្ងៃចន្ទ ២០ តុលា ២០២៥

ដោយ

ជារឿងគួរឲ្យភ្ញាក់ផ្អើលនិងជាការលួចដ៏មិនខ្លាចរអាទាល់តែសោះ ចោរមួយក្រុមបានប្រើពេលតែ៤នាទីប៉ុណ្ណោះ លួចយកគ្រឿងអលង្ការរបស់រាជវង្សបារាំងដ៏មិនអាចកាត់ថ្លៃបានចំនួនប្រាំបីពីសារមន្ទីរ Louvre ក្នុងទីក្រុងប៉ារីសកាលពីថ្ងៃអាទិត្យ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP។

យោងតាមមន្ត្រីបារាំង ក្រុមចោរបានប្រើជណ្តើរយន្តដើម្បីឡើងជញ្ជាំងសារមន្ទីLouvre ហើយវាយបំបែកបង្អួច និងវាយកញ្ចក់ពីរដែលដាក់តាំងគ្រឿងអលង្ការរបស់រាជវង្សក្នុងវិចិត្រសាល Apollon ដែលជាកន្លែងប្រមូលផ្ដុំគ្រឿងអលង្ការជាប្រវត្តិសាស្ត្ររបស់ប្រទេសបារាំង។ ការលួចនេះបានកើតឡើងត្រឹមតែ៣០នាទីបន្ទាប់ពីសារមន្ទីរបានបើកមនុស្សចូលទស្សនា។

ក្នុងចំណោមបំណែកគ្រឿងអលង្ការដែលត្រូវបានចោរលួចនោះ មានគ្រឿងអលង្ការដែលធ្លាប់ជាកម្មសិទ្ធិរបស់រាជវង្សបារាំង រួមមានត្បូងកណ្តៀង និងត្បូងមរកតដែលជាកម្មសិទ្ធិរបស់ ព្រះនាង Marie-Amelie និងព្រះនាង Hortense, ព្រះចៅអធិរាជ Marie-Louise និងព្រះចៅអធិរាជ Eugenie។ ក្នុងនោះវត្ថុមួយ ជាមកុដត្បូងមរកតរបស់ព្រះចៅអធិរាជ Eugenie ក្រោយមកត្រូវបានគេប្រទះឃើញបែកបាក់នៅខាងក្រៅសារមន្ទីរ។

ក្រុមចោរបានជិះម៉ូតូគេចខ្លួនបាត់មុនពេលសមត្ថកិច្ចមកដល់ ។ ប៉ូលិសពណ៌នាការប្លន់នេះថាជា «ប្រតិបត្តិការប្រកបដោយវិជ្ជាជីវៈ» ខណៈដែលបុគ្គលិកសារមន្ទីបានត្អូញត្អែរជាយូរមកហើយអំពីចំនួនមនុស្សច្រើនលើសលប់មកទស្សនាសារមន្ទី តែមានបុគ្គលិកតិចតួច។

ការលួចទាំងកណ្ដាលថ្ងៃនេះ ក៏បង្កឱ្យមានកំហឹងនយោបាយផងដែរ ដោយមេដឹកនាំស្តាំនិយមលោក Jordan Bardella បានហៅវាថាជា «ការអាម៉ាស់របស់ប្រទេសបារាំង» ដោយចោទប្រកាន់រដ្ឋាភិបាលថាមិនបានការពារទ្រព្យសម្បត្តិជាតិ។

អ្នកជំនាញបានព្រមានថា ការយកគ្រឿងអលង្ការមកវិញអាចជាការពិបាក ព្រោះថាចោរមានវិជ្ជាជីវៈតែងតែកាត់ផ្ដាច់ ឬលក់ត្បូងម្ដងបន្តិចៗ ដោយលុបបំបាត់អត្តសញ្ញាណប្រវត្តិសាស្ត្ររបស់ត្បូង។ ឥឡូវនេះប៉ូលិសកំពុងពិនិត្យមើលវីដេអូ CCTV និងធ្វើការស៊ើបអង្កេត។ សារមន្ទី Louvre ត្រូវបានបិទអស់ពេញមួយថ្ងៃដើម្បីត្រួតពិនិត្យស៊ើបអង្កេត។

គួរបញ្ជាក់ថា សារមន្ទីរ Louvre ជាសារមន្ទីរដែលមានអ្នកចូលទស្សនាច្រើនជាងគេបំផុតរបស់ពិភពលោក។ សារមន្ទីនេះក៏ធ្លាប់បានទទួលរងការលួចដ៏ល្បីល្បាញពីមុនមកដែរ រួមទាំងការលួចផ្ទាំងគំនូរ Mona Lisa ឆ្នាំ១៩១១ ប៉ុន្តែការលួចកាលពីថ្ងៃអាទិត្យនេះបានធ្វើឱ្យមានការព្រួយបារម្ភជាថ្មីអំពីសុវត្ថិភាពនៃបេតិកភណ្ឌវប្បធម៌របស់ប្រទេសបារាំង៕