កូឡុំប៊ី កោះហៅឯកអគ្គរដ្ឋទូតអាមេរិកមកវិញ បន្ទាប់ពី ត្រាំ គំរាមយកពន្ធបន្ថែម

ប្រទេសកូឡុំប៊ីបានកោះហៅឯកអគ្គរដ្ឋទូតរបស់ខ្លួនប្រចាំនៅសហរដ្ឋអាមេរិកឡើងវិញ បន្ទាប់ពីប្រធានាធិបតី ដូណាល់ ត្រាំ បានគម្រាមដាក់ពន្ធថ្មី និងបញ្ឈប់ជំនួយហិរញ្ញវត្ថុ ខណៈដែលបានចោទប្រកាន់ប្រធានាធិបតីកូឡុំប៊ីលោក Gustavo Petro ថាជា «មេដឹកនាំគ្រឿងញៀនខុសច្បាប់»។

ចំណាត់ការការទូតនេះត្រូវបានបញ្ជាក់ដោយក្រសួងការបរទេសរបស់ប្រទេសកូឡុំប៊ី ដោយឯកអគ្គរដ្ឋទូត Daniel Garcia-Pena ត្រូវបានកោះហៅឲ្យត្រឡប់ទៅទីក្រុង Bogota វិញដើម្បីធ្វើការពិគ្រោះយោបល់។ ជម្លោះ​នេះ​កើត​ចេញ​ពី​ការ​វាយ​ប្រហារ​របស់​យោធា​អាមេរិក​លើ​ទូក​នៅ​តំបន់​ការាបៀន​ដោយ​ចោទ​ថា​បាន​ដឹក​ជញ្ជូន​គ្រឿងញៀន។ប្រតិបត្តិការ​របស់អាមេរិកនេះ​បាន​សម្លាប់​មនុស្ស​រាប់​សិប​នាក់ ហើយរងការ​រិះគន់​ពីប្រធានាធិបតីកូឡុំប៊ីនិង​ក្រុម​សិទ្ធិមនុស្ស។

លោក ត្រាំ បានប្រកាសផែនការដំឡើងពន្ធលើទំនិញរបស់ប្រទេសកូឡុំប៊ី និងកាត់បន្ថយជំនួយរបស់សហរដ្ឋអាមេរិកខណៈប្រទេសកូឡុំប៊ី ដែលធ្លាប់ជាប្រទេសទទួលជំនួយកំពូលរបស់សហរដ្ឋអាមេរិកមើលឃើញថា ជំនួយរបស់ខ្លួនភាគច្រើនត្រូវបានកាត់បន្ថយនៅឆ្នាំនេះ បន្ទាប់ពីបិទប្រតិបត្តិការរបស់ USAID ។

ទោះយ៉ាងណាកូឡុំប៊ី ថាសម្ដីត្រាំជាការប្រមាថ ហើយនឹងធ្វើឱ្យទំនាក់ទំនងរវាងប្រទេសទាំងពីរកាន់តែអាក្រក់ទៅៗ ដោយប្រធានាធិបតីកូឡុំប៊ី បានរិះគន់ការវាយប្រហារតាមអាកាសនាពេលថ្មីៗនេះរបស់សហរដ្ឋអាមេរិក សម្លាប់ជនស៊ីវិលបីនាក់ ដែលពួកគេសុទ្ធតែគ្មានកំហុស និងមិនមែនជាសមាជិកនៃក្រុមឧទ្ទាម ដូចដែលសហរដ្ឋអាមេរិកបានអះអាងនោះទេ។ លោកក៏បានឆ្លើយតបទៅនឹង ត្រាំ នៅលើប្រព័ន្ធផ្សព្វផ្សាយសង្គមដោយហៅត្រាំថា «ឈ្លើយ និងល្ងង់» ហើយថាលោកមិនមានទំនាក់ទំនងជាមួយការជួញដូរគ្រឿងញៀនដូចត្រាំចោទនោះទេ។

គួរបញ្ជាក់ថាភាពតានតឹងបានប៉ះពាល់ដល់ទីផ្សាររួចហើយ ដោយប្រាក់ប៉េសូរបស់ប្រទេសកូឡុំប៊ីបានធ្លាក់ចុះ ១.២៨% កាលពីថ្ងៃចន្ទដល់ ៣,៨៨៣ ក្នុងមួយដុល្លារអាមេរិក។ សហរដ្ឋអាមេរិកនៅតែជាដៃគូពាណិជ្ជកម្មដ៏ធំបំផុតរបស់ប្រទេសកូឡុំប៊ី ដែលស្មើនឹង ៣៥% នៃការនាំចេញរបស់ខ្លួន និង ៧០% នៃការនាំចូលរបស់ខ្លួនភាគច្រើនជាទំនិញសំខាន់ៗមិនផលិតក្នុងស្រុក។

រដ្ឋាភិបាលរបស់ប្រទេសកូឡុំប៊ីបានប្តេជ្ញាប្រមូលផ្តុំការគាំទ្រអន្តរជាតិចំពោះឯករាជ្យភាពរបស់ខ្លួនចំពេលមានភាពតានតឹងផ្នែកនយោបាយ និងសេដ្ឋកិច្ចដែលកំពុងកើនឡើងរវាងទីក្រុង Bogota និងវ៉ាស៊ីនតោន៕

អត្ថបទ៖ ប៊ុន សុភាព