ព្យុះ Fung-wong រំកិល​ដល់​តៃវ៉ាន់ បង្ក​ជា​គ្រោះ​ទឹកជំនន់ និង​ត្រូវ​ជម្លៀស​មនុស្ស​ជាង​៨០០០​នាក់

តៃវ៉ាន់​បាន​ជម្លៀស​មនុស្ស​ជាង​៨៣០០​នាក់ ខណៈ​ព្យុះទីហ្វុង Fung-wong បាន​នាំ​មក​នូវ​ភ្លៀង​ធ្លាក់​យ៉ាង​ខ្លាំង និង​ទឹក​ជំនន់​យ៉ាង​ធ្ងន់ធ្ងរ​ដល់​ឆ្នេរ​ភាគ​ខាង​កើត​របស់​កោះ​កាល​ពី​​ថ្ងៃ​​អង្គារ​​ទី​១១​​ខែ​វិច្ឆិកា​ឆ្នាំ​២០២៥​។

ខ្យល់ព្យុះដែលបានសម្លាប់មនុស្ស១៨នាក់នៅក្នុងប្រទេសហ្វីលីពីន បានបណ្តាល​ឲ្យ​មានទឹកជំនន់យ៉ាងខ្លាំងនៅតំបន់មួយចំនួននៃទីក្រុង Yilan ជាកន្លែងដែលទាហានត្រូវបានដាក់ពង្រាយ ដើម្បីជួយសង្គ្រោះអ្នកស្រុកដែលជាប់គាំង។

នៅ​ក្នុង​បទ​សម្ភាសន៍​ជាមួយ​រ៉យទ័រ អ្នកនេសាទ​ម្នាក់​ឈ្មោះ Hung Chun-yi មកពីទីក្រុងកំពង់ផែ Suao ភាគខាងកើត បាន​រៀបរាប់​ថា «ទឹកបានចូលមកយ៉ាងលឿន។ ភ្លៀង​ធ្លាក់​ខ្លាំង​ពេក ហើយ​លឿន​ពេក ប្រព័ន្ធ​លូ​មិន​អាច​ទប់ជាប់»។

អាជ្ញាធរ​បាន​រាយការណ៍​ថា មនុស្ស​យ៉ាងតិច​៥១​នាក់​បាន​រង​របួស។ អាជីវកម្ម និងសាលារៀនត្រូវបានបិទនៅទូទាំងភាគខាងត្បូងកោះតៃវ៉ាន់ ដោយសារភ្លៀងធ្លាក់ខ្លាំងបានបង្កជាទឹកជំនន់ភ្លាមៗ និងការរអិលបាក់ដី។

យោងតាមមន្ត្រីឧតុនិយម ទីប្រជុំជន Dongshan របស់​តំបន់ Yilan បានកត់ត្រាទឹកភ្លៀងជិត​៨០០​មិល្លិម៉ែត្រ​កាលពីថ្ងៃអង្គារ។

រដ្ឋបាលអាកាសធាតុកណ្តាល បាននិយាយថា ខ្យល់​ព្យុះ Fung-wong ត្រូវបានគេរំពឹងថានឹងរំកិល​​កាត់​ចុងភាគខាងត្បូងនៃកោះតៃវ៉ាន់ មុនពេលផ្លាស់ទីចូលទៅក្នុងមហាសមុទ្រប៉ាស៊ីហ្វិកនៅ​រសៀល​ថ្ងៃពុធ​​នេះ។

នៅតំបន់ Hualien ក្បែរនោះ ដែលបានរងគ្រោះទឹកជំនន់ដ៏អាក្រក់ពីព្យុះទីហ្វុងក្នុងខែកញ្ញា អ្នកស្រុកជាង៣០០០​នាក់​​ត្រូវបានផ្លាស់ទៅទី​កន្លែង​សុវត្ថិភាព​ដើម្បីជាការប្រុងប្រយ័ត្ន។

ទីក្រុងភាគខាងជើងនៃ Hsinchu ដែលជាទីតាំង​របស់ក្រុមហ៊ុនផលិតបន្ទះឈីបដ៏ធំបំផុតរបស់ពិភពលោក TSMC មិនត្រូវបានរំពឹងថានឹងរងផលប៉ះពាល់នោះទេ៕

​ប្រែសម្រួល៖ ឈាង