ទឹក​ជំនន់​ទៀតហើយ​នៅ​ឥណ្ឌូណេស៊ី! លើក​នេះ ស្លាប់​១៤​នាក់ និង​១៨​នាក់​រង​របួស

មនុស្សយ៉ាងហោចណាស់១៤នាក់បានបាត់បង់ជីវិត និង១៨នាក់ផ្សេងទៀតបានរងរបួស បន្ទាប់ពីទឹកជំនន់បានវាយប្រហារស្រុក Sitaro Islands ក្នុងខេត្តស៊ូឡាវេស៊ីភាគខាងជើង (North Sulawesi) នៃប្រទេសឥណ្ឌូណេស៊ី កាលពីព្រឹកថ្ងៃចន្ទ​ទី៥ខែមករា។

យោង​តាម​ការ​ចុះ​ផ្សាយរបស់​​រ៉យទ័រ គ្រោះមហន្តរាយ ដែលបង្កឡើងដោយភ្លៀងធ្លាក់យ៉ាងខ្លាំងនៅលើកោះ Siau បានបណ្តាលឲ្យមនុស្ស៤នាក់បាត់ខ្លួន និងបង្ខំឲ្យអ្នកស្រុកជិត៤៥០នាក់ភៀសខ្លួនទៅកាន់សាលារៀន និងព្រះវិហារក្នុងតំបន់។

អាជ្ញាធរមូលដ្ឋានបានប្រកាស​ស្ថានភាពអាសន្នរយៈពេល១៤ថ្ងៃ រហូតដល់ថ្ងៃទី១៨ខែមករា ខណៈដែលក្រុមអ្នកជួយសង្គ្រោះកំពុងជួបការលំបាកយ៉ាងខ្លាំងដោយសារភក់ រ៉ែថ្ម និងកម្ទេចកម្ទីដែលកំពុងបិទផ្លូវធ្វើដំណើរសំខាន់ៗ។

លោក Nuriadin Gumeleng អ្នកនាំពាក្យទីភ្នាក់ងារជួយសង្គ្រោះក្នុងតំបន់ បានបញ្ជាក់ថា ភ្នាក់ងារជំនាញចំនួន១៦នាក់ត្រូវបានដាក់ពង្រាយ ដើម្បីស្វែងរកអ្នកដែលនៅបាត់ខ្លួន។ អភិបាលខេត្តស៊ូឡាវេស៊ីភាគខាងជើង លោក Yulius Selvanus បានរាយការណ៍ថា ទឹកជំនន់បានបំផ្លាញផ្ទះសម្បែងរាប់រយខ្នង និងអគាររដ្ឋាភិបាលមួយចំនួន ដែលនាំឲ្យមានការបញ្ជូនគ្រឿងចក្រកាយដី ដើម្បីបើកផ្លូវទៅកាន់តំបន់ដែលត្រូវបានកាត់ផ្តាច់។

គ្រោះមហន្តរាយនេះ កើតឡើងចំពេលកំពូលនៃរដូវវស្សារបស់ប្រទេសឥណ្ឌូណេស៊ី ដែលមន្ត្រីឧតុនិយម​ព្រមានថា នឹងនាំមកនូវហានិភ័យទឹកជំនន់កាន់តែខ្លាំងដល់កោះ Java, Sulawesi, Maluku និង Papua រហូតដល់ខែកុម្ភៈ។ វិបត្តិបច្ចុប្បន្ននេះ កើតឡើងបន្ទាប់ពី​មហន្តរាយនៅចុងឆ្នាំ២០២៥ ដែលទឹកជំនន់បង្កឡើងដោយខ្យល់ព្យុះស៊ីក្លូននៅកោះស៊ូម៉ាត្រា បានសម្លាប់មនុស្សជាង ១១៥០នាក់។ ក្រុមអ្នកបរិស្ថានបានចង្អុលបង្ហាញថា ការកាប់បំផ្លាញព្រៃឈើយ៉ាងខ្លាំងពីការធ្វើអណ្តូងរ៉ែ និងការកាប់ឈើ គឺជាកត្តាចម្បងដែលធ្វើឲ្យទំហំនៃទឹកជំនន់តាមរដូវកាលទាំងនេះកាន់តែធ្ងន់ធ្ងរនៅទូទាំង​ប្រទេស​ប្រជុំកោះមួយ​​នេះ៕

ប្រែសម្រួល៖​ ឈាង