ផែនការ១០០ពាន់លានដុល្លារ៖ ការស្តារវិស័យប្រេង​វ៉េណេស៊ុយអេឡា បន្ទាប់ពីការចាប់ខ្លួនម៉ាឌូរ៉ូ

បន្ទាប់ពីការចាប់ខ្លួនលោក នីកូឡាស ម៉ាឌូរ៉ូ ដោយកងកម្លាំងអាមេរិកក្នុងខែមករា​ឆ្នាំ២០២៦ សហរដ្ឋអាមេរិកបានចាត់វិធានការយ៉ាងខ្លាំងក្លាក្នុងការរៀបចំវិស័យថាមពលរបស់វ៉ែណេស៊ុយអេឡាឡើងវិញ។ ប្រធានាធិបតី ដូណាល់ ត្រាំ បានអំពាវនាវ​ឲ្យ​ក្រុមហ៊ុនប្រេងយក្សរបស់អាមេរិកវិនិយោគទឹកប្រាក់ចំនួន​១០០ពាន់លានដុល្លារ ដើម្បីកែលម្អហេដ្ឋារចនាសម្ព័ន្ធដែលទ្រុឌទ្រោម និងទាញយកប្រយោជន៍ពីប្រភពប្រេងបម្រុងដ៏ធំបំផុតរបស់ពិភពលោក។

ក្នុងកិច្ចប្រជុំនៅសេតវិមានកាលពីថ្ងៃទី៩​ខែមករា លោកប្រធានាធិបតីបានសង្កត់ធ្ងន់ថា ថវិកានេះគួរតែបានមកពីក្រុមហ៊ុនឯកជនដូចជា Chevron, ExxonMobil និង ConocoPhillips ជាជាងប្រើប្រាស់ប្រាក់ពន្ធរបស់ប្រជាជនអាមេរិក។ លោកក៏បានសន្យានូវ «សុវត្ថិភាព និងសន្តិសុខដាច់ខាត» សម្រាប់ក្រុមហ៊ុនទាំងនេះ ដោយថែមទាំងបញ្ជាក់ថា យោធាអាមេរិកនឹងត្រួតពិនិត្យវិស័យនេះដោយផ្ទាល់ដើម្បីការពារទ្រព្យសម្បត្តិវិនិយោគទាំងនោះ។

ទោះបីជារដ្ឋបាលអាមេរិកបានដាក់ចេញនូវផែនការរយៈពេល១៨ខែដើម្បីបង្កើនផលិតកម្មក៏ដោយ ប៉ុន្តែប្រតិកម្មពីក្រុមហ៊ុនប្រេងធំៗមានលក្ខណៈចម្រុះគ្នា។ ក្រុមហ៊ុន Chevron ដែលមានវត្តមានស្រាប់នៅក្នុងប្រទេសវ៉េណេស៊ុយអេឡា បានបង្ហាញឆន្ទៈក្នុងការបង្កើនផលិតកម្មរបស់ខ្លួនទ្វេដងភ្លាមៗ។ ប៉ុន្តែ នាយកប្រតិបត្តិក្រុមហ៊ុន ExxonMobil លោក Darren Woods បានលើកឡើងថា ស្ថានភាពបច្ចុប្បន្ន «មិនទាន់អាចវិនិយោគបានឡើយ» ដោយសារតែការធ្វេសប្រហែសរាប់ទសវត្សរ៍ ការបាត់បង់ឧបករណ៍បច្ចេកទេស និងកង្វះការការពារផ្នែកច្បាប់។ បញ្ហានេះបាននាំ​ឲ្យ​មានការព្រមានខ្លាំងៗពីសេតវិមានថា ក្រុមហ៊ុនណាដែល «រារែក» អាចនឹងត្រូវបាត់បង់ឱកាសនាពេលអនាគតទៅ​ឲ្យ​ក្រុមហ៊ុនប្រកួតប្រជែងផ្សេងទៀតដែលហ៊ានវិនិយោគ។

ផ្នែកហិរញ្ញវត្ថុវិញ អាមេរិកបានចាប់ផ្តើមគ្រប់គ្រងធនធានដែលមានស្រាប់របស់វ៉េណេស៊ុយអេឡា ដោយរឹបអូសប្រេងឆៅចន្លោះពី ៣០ ទៅ ៥០លានបារ៉ែល ដែលមានតម្លៃប្រហែល ៤.២ពាន់លានដុល្លារ។ ថវិកាទាំងនេះត្រូវបានរក្សាទុកក្នុងគណនីរតនាគារដែលគ្រប់គ្រងដោយអាមេរិកក្រោមបទបញ្ជាប្រតិបត្តិថ្មី ដើម្បីការពារប្រាក់ចំណូលទាំងនោះពីការទាមទាររបស់ម្ចាស់បំណុលឯកជន។ គោលនយោបាយ «ចាប់ផ្តើមថ្មី» នេះ មានគោលបំណងធានាថា ចំណូលពីប្រេងនឹងត្រូវប្រើប្រាស់សម្រាប់ការកសាងឡើងវិញ និងជំនួយមនុស្សធម៌ ជាជាងយកទៅសងបំណុលរាប់ពាន់លានដុល្លារដែលបន្សល់ទុកដោយរបបចាស់។ ទោះបីជាមានភាពរីកចម្រើនផ្នែកនយោបាយក៏ដោយ អ្នកវិភាគថាមពលបានព្រមានថា ដើម្បី​ឲ្យ​វ៉េណេស៊ុយអេឡាត្រឡប់ទៅរកកម្រិតផលិតកម្ម ៣​លានបារ៉ែលក្នុងមួយថ្ងៃដូចដើមវិញ គេអាចនឹងត្រូវចំណាយប្រាក់រហូតដល់ ១៨០ពាន់លានដុល្លារ និងប្រើពេលជិតមួយទសវត្សរ៍ ដើម្បីស្តារឡើងវិញនូវវិស័យដែលបានខូចខាតយ៉ាងធ្ងន់ធ្ងរនេះ៕

ដោយ៖ ឈាង