ស្ថានភាព​​វិបត្តិ​ថាមពល​នៅ​អាស៊ាន ក្រោយ​ផ្លូវទឹក Hormuz ត្រូវបានបិទ

រយៈពេល​ជិត​មួយខែហើយដែលច្រកសមុទ្រ Hormuz ដែលជាសរសៃឈាមសេដ្ឋកិច្ចពិភពលោកត្រូវបានបិទ។ ព្រឹត្តិការណ៍នេះបានរុញច្រានបណ្ដាប្រទេសនៅអាស៊ីអាគ្នេយ៍ (អាស៊ាន) ឲ្យ​ធ្លាក់ចូលក្នុងស្ថានភាព «សង្គ្រោះបន្ទាន់ផ្នែកថាមពល» កម្រិតធ្ងន់បំផុត ដោយរដ្ឋាភិបាល​​នៃ​សមាជិក​នីមួយៗ​​​បានចាប់ផ្ដើមអនុវត្តវិធានការត្បិតត្បៀតដែលមិនធ្លាប់មានពីមុនមក ដើម្បីទប់ទល់នឹងការដួលរលំសេដ្ឋកិច្ច។

ជីវភាពថ្មីក្នុងគ្រាវិបត្តិ៖ សន្សំសំចៃដល់កម្រិត

ឥឡូវនេះ ជីវិតរស់នៅប្រចាំថ្ងៃរបស់ប្រជាជនអាស៊ានបានប្រែប្រួលទាំងស្រុង៖

ហ្វីលីពីន៖ មន្ត្រីរាជការធ្វើការតែ៤ថ្ងៃក្នុងមួយសប្តាហ៍ ហើយម៉ាស៊ីនត្រជាក់មិនត្រូវដាក់​ឲ្យ​ទាបជាង២៤អង្សាសេឡើយ។

ថៃ៖ នាយករដ្ឋមន្ត្រីបានជំរុញ​ឲ្យមន្ត្រីងាកមកប្រើប្រាស់ជណ្ដើរជើងជំនួស​ឲ្យ​ជណ្ដើរយន្ត និង​ឲ្យ​បុគ្គលិករាប់ពាន់នាក់ធ្វើការពីផ្ទះ។

កម្ពុជា៖ ស្ថានីយប្រេងឥន្ធនៈជិត ១៦០០កន្លែងត្រូវបានត្រួតពិនិត្យយ៉ាងតឹងរ៉ឹងបំផុត ដើម្បីទប់ស្កាត់ការស្តុកទុកប្រេងខុសច្បាប់។

សិង្ហបុរី៖ តម្លៃអគ្គិសនីត្រូវគេរំពឹងថានឹងកើនឡើងទ្វេដងនៅខែក្រោយ ដោយសារការដេញថ្លៃទិញហ្គាស (LNG) កាន់តែពិបាក និងមានតម្លៃខ្ពស់កប់ពពក។

ការងាកទៅរក «មិត្តចាស់» រុស្ស៊ី

ដោយសារតែតំបន់មជ្ឈិមបូព៌ាលែងជាប្រភពប្រេងដែលមានសុវត្ថិភាព ប្រទេសធំៗក្នុងអាស៊ានបានសម្រេចចិត្តងាកទៅរករុស្ស៊ី ដើម្បីបំពេញចន្លោះខ្វះខាត។ ប្រទេសថៃកំពុងប្រញាប់ប្រញាល់ទិញប្រេងពីរុស្ស៊ី មុនពេលអាជ្ញាប័ណ្ណអនុគ្រោះពីអាមេរិកត្រូវផុតកំណត់។ ចំណែកឯវៀតណាមវិញ បានឈានដល់ការចុះហត្ថលេខាជាមួយរុស្ស៊ី ដើម្បីសាងសង់រោងចក្រនុយក្លេអ៊ែរដំបូងគេរបស់ខ្លួន និងពង្រីកការស្តុកទុកហ្គាស ដើម្បីកាត់បន្ថយការពឹងផ្អែកលើតំបន់មជ្ឈិមបូព៌ាជារៀងរហូត។

សម្ពាធក្នុងរដូវបុណ្យទាន

វិបត្តិនេះបានកើតឡើងចំពេលដែលឥណ្ឌូណេស៊ី និងម៉ាឡេស៊ី កំពុងត្រៀមខ្លួនសម្រាប់រដូវបុណ្យ Idul Fitri ដែលជាពេលដែលតម្រូវការប្រេងហក់ឡើងខ្ពស់បំផុត។ រដ្ឋាភិបាលឥណ្ឌូណេស៊ីបានសន្យថានឹងមិនដំឡើងថ្លៃប្រេងដើម្បីចៀសវាងការតវ៉ាពីប្រជាជន ប៉ុន្តែអ្នកសេដ្ឋកិច្ចព្រមានថា នេះកំពុងធ្វើ​ឲ្យ​បាត់បង់ថវិកាជាតិរាប់រយលានដុល្លារ ដែលមិនអាចទ្រាំទ្របានយូរអង្វែងឡើយ។

ផ្លូវទៅមុខ៖ សន្តិសុខជាតិជាចម្បង

នៅពេលដែលការបិទច្រកសមុទ្រនេះនៅ​តែ​បន្ត​កើត​មាន​ អាស៊ានគ្មានជម្រើសអ្វីក្រៅពីការពន្លឿនគម្រោង «បណ្តាញអគ្គិសនីអាស៊ាន» (ASEAN Power Grid) ដើម្បីចែករំលែកថាមពលកកើតឡើងវិញរវាងប្រទេសជិតខាងនោះទេ។ សម្រាប់ពេលនេះ តំបន់ទាំងមូលនៅតែស្ថិតក្រោមឥទ្ធិពលនៃការ «បិទផ្លូវទឹក» ដែលមានតែនាវាដឹកប្រេងមួយចំនួនតូចប៉ុណ្ណោះដែលអាចឆ្លងកាត់បាន ក្រោមការអនុញ្ញាតពិសេសផ្នែកការទូត៕

អត្ថបទ៖ ឈាង