ថ្ងៃស៊យ! ប៉ូលិសវៀតណាមមួយក្រុម ផាកពិន័យអ្នកល្មើសច្បាប់ចរាចរណ៍ ប៉ះចំអ្នកកើតកូវីដ

ប៉ូលិសចរាចរណ៍វៀតណាមចំនួន៥នាក់ ត្រូវបានបញ្ជូនទៅកាន់មណ្ឌលចត្តាឡីស័ក ក្នុងខេត្ត Dong Nai បន្ទាប់ពីពួកគេ មានទំនាក់ទំនងជិតស្និទ្ធជាមួយអ្នករំលោភច្បាប់ចរាចរណ៍ម្នាក់ ហើយម្នាក់នោះមានកើតជំងឺកូវីដ-១៩។

យោងតាមការិយាល័យប៉ូលិសស្រុក Xuan Loc នៃខេត្ត Dong Nai បានឲ្យដឹងថា មន្រ្តីទាំងនេះត្រូវបានគេចាត់ទុកថាមានហានិភ័យខ្ពស់នៃការឆ្លងវីរុសកូរ៉ូណា បន្ទាប់ពីផាកពិន័យប៉ះចំមនុស្សដែលក្រោយមក បានធ្វើតេស្តវិជ្ជមាន។

អ្នកជំងឺត្រូវបានគេប្រាប់ឈ្មោះជាអក្សរកាត់ថា N.X.G.T. អាយុ១៧ឆ្នាំ មកពីខេត្ត Binh Thuan ហើយបច្ចុប្បន្នកំពុងស្នាក់នៅក្នុងសង្កាត់ Go Vap នៃទីក្រុងហូជីមិញ។

គាត់ត្រូវបានចាប់ខ្លួនដោយប៉ូលិសស្រុក Xuan Loc ពេលកំពុងធ្វើដំណើរទៅកាន់ទីក្រុងហូជីមិញចេញពីស្រុកកំណើត។

បន្ទាប់ពីពិនិត្យមើលឯកសារ ប៉ូលិសបានរកឃើញថា គាត់ល្មើសច្បាប់ ហើយសម្រេចចិត្តឃាត់ម៉ូតូគាត់ទុក។

បន្ទាប់មក T. បានបន្តដំណើរដោយជិះឡានក្រុងទៅកាន់ទីក្រុង ហូជីមិញ។ នៅទីនោះ គាត់បានធ្វើតេស្តវិជ្ជមានជំងឺកូវីដ-១៩កាលពីថ្ងៃសៅរ៍។

បន្ទាប់ពីទទួលបានព័ត៌មានអំពីករណីវិជ្ជមាននេះ ការិយាល័យប៉ូលិសស្រុក Xuan Loc បានកោះហៅមន្រ្តីទាំង៥នាក់ឲ្យមកធ្វើតេស្ត ហើយបញ្ជូនពួកគេទៅមណ្ឌលចត្តាឡីស័កក្នុងស្រុក Trang Bom៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ ខ្លាចកូវីដ! វៀតណាម ហាមមនុស្សមកពី ៤ ប្រទេសមិនឲ្យចូល ក្នុងនោះមាន កម្ពុជា ដែរ