រុស្ស៊ី គំរាមទម្លាក់គ្រាប់បែកលើនាវាចម្បាំង អង់គ្លេស

ប្រទេសរុស្ស៊ី បានព្រមានចក្រភពអង់គ្លេស កាលពីថ្ងៃព្រហស្បតិ៍ថា ខ្លួននឹងទម្លាក់គ្រាប់បែកលើនាវាកងទ័ពជើងទឹកអង់គ្លេស នៅក្នុងសមុទ្រខ្មៅ ប្រសិនបើកងទ័ពជើងទឹកអង់គ្លេសបង្កធ្វើសកម្មភាពបង្កហេតុណាមួយបន្ថែមទៀត នៅឯឆ្នេរតំបន់គ្រីមៀ ដែលកាត់យកដោយរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសរុស្ស៊ី បានកោះហៅឯកអគ្គរាជទូតអង់គ្លេសប្រចាំនៅទីក្រុងមូស្គូ ដើម្បីតវ៉ាផ្នែកការទូតជាផ្លូវការ បន្ទាប់ពីនាវាចម្បាំង បានរំលោភបំពានលើអ្វីដែលវិមានក្រឹមឡាំងនិយាយថា ជាដែនទឹករបស់ខ្លួន ប៉ុន្តែ អង់គ្លេសនិងពិភពលោកភាគច្រើននិយាយថា ជារបស់អ៊ុយក្រែន។

អង់គ្លេសបាននិយាយថា ប្រទេសរុស្ស៊ីកំពុងផ្សព្វផ្សាយព័ត៌មានមិនពិត អំពីឧប្បត្តិហេតុនេះ។ សេចក្តីរាយការណ៍និយាយថា មិនមានការបាញ់ព្រមានណាមួយទេ ហើយក៏គ្មានគ្រាប់បែកណាមួយត្រូវបានទម្លាក់នៅក្នុងផ្លូវ របស់នាវាចម្បាំងកងទ័ពជើងទឹក Defender ដែរ។

នៅទីក្រុងមូស្គូ រុស្ស៊ីបានកោះហៅឯកអគ្គរាជទូត Deborah Bronnert ដើម្បីស្តីបន្ទោសចំពោះអ្វីដែលខ្លួននិយាយថា ជាសកម្មភាពដ៏គ្រោះថ្នាក់របស់អង់គ្លេសនៅក្នុងសមុទ្រខ្មៅ ខណៈអ្នកនាំពាក្យក្រសួងការបរទេសរុស្ស៊ីលោកស្រី Maria Zakharova បានចោទប្រកាន់ទីក្រុងឡុងដ៍ថា “ភូតកុហកដោយឥតអៀនខ្មាស”។

អនុរដ្ឋមន្រ្តីក្រសួងការបរទេសរុស្ស៊ីលោក Sergei Ryabkov បានប្រាប់ទីភ្នាក់ងារសារព័ត៌មានរុស្ស៊ីថា “យើងអាចអំពាវនាវឲ្យមានស្មារតីរួម, ទាមទារការគោរពច្បាប់អន្តរជាតិហើយប្រសិនបើមិនដំណើរការ យើងអាចទម្លាក់គ្រាប់បែកបាន”។

ដោយសំដៅទៅករណីដែលយន្តហោះរុស្ស៊ីទម្លាក់គ្រាប់បែកលើនាវាពិឃាតអង់គ្លេស លោក Ryabkov បាននិយាយថា គ្រាប់បែកនាពេលអនាគត នឹងត្រូវទម្លាក់មិនត្រឹមតែនៅលើផ្លូវរបស់វាប៉ុណ្ណោះទេ ប៉ុន្តែថែមទាំងគោលដៅផងដែរ៕

ប្រែសម្រួល៖ Vann Vann

ប្រភព៖ Reuters

ចុចអាន៖ រុស្ស៊ី បាញ់ទៅលើនាវាចម្បាំង អង់គ្លេស បន្ទាប់ពីចូលដែនទឹក ក្បែរតំបន់គ្រីមៀ