អាមេរិក និងអ៊ុយក្រែន ធ្វើសមយុទ្ធរួមគ្នានៅសមុទ្រខ្មៅ ដាក់ការព្រមានដល់ រុស្ស៊ី

សមយុទ្ធយោធាទ្រង់ទ្រាយធំមួយ ដែលមានការចូលរួមពីប្រទេសប្រមាណ ៣០ រួមមានសហរដ្ឋអាមេរិក និងអ៊ុយក្រែន បានចាប់ផ្តើមនៅសមុទ្រខ្មៅ ដោយដាក់ប្រទេសរុស្ស៊ីស្ថិតក្នុងការប្រុងប្រយ័ត្ន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមយុទ្ធទ័ពជើងទឹក ដែលមានឈ្មោះថា “Sea Breeze 2021” បានចាប់ផ្តើមកាលពីថ្ងៃចន្ទ ដោយមានប្រទេសប្រហែល ៣០ កងទ័ពប្រហែល ៥,០០០ នាក់ និងនាវាចម្បាំងជាង ៣០ គ្រឿង ។

សមយុទ្ធប្រចាំឆ្នាំនេះ បានបន្តអស់រយៈពេលជាងពីរទសវត្សមកហើយ ដោយមានសមាជិកអង្គការណាតូចូលរួមផងដែរ ខណៈគោលបំណងនៃសមយុទ្ធនេះ គឺដើម្បីពង្រឹងសន្តិសុខដែនសមុទ្រនៅតំបន់សមុទ្រខ្មៅ ។

ទន្ទឹមនោះ អង្គការណាតូបាននិយាយថា ខ្លួនបានបង្កើនវត្តមាននៅក្នុងតំបន់ ចាប់តាំងពីការបញ្ចូលតំបន់គ្រីមៀដោយខុសច្បាប់របស់រុស្ស៊ីក្នុងឆ្នាំ ២០១៤ ។

ចំណែកអ៊ុយក្រែនវិញបាននិយាយថា ចំនួនអ្នកចូលរួមច្រើននៅក្នុងសមយុទ្ធនេះ ឆ្លុះបញ្ចាំងពីការគាំទ្រដែលខ្លួនទទួលបានពីទូទាំងពិភពលោក ។ ប្រទេសនេះសង្ឃឹមថា នឹងបញ្ជាក់តាមរយៈសមយុទ្ធនេះថា ពួកគេមានការប្តេជ្ញាចិត្តរួមគ្នាជាមួយបណ្តាប្រទេសលោកខាងលិច ក្នុងការប្រឈមមុខដាក់ប្រទេសរុស្ស៊ី ។

ពាក់ព័ន្ធនឹងបញ្ហានេះដែរ កាលពីសប្តាហ៍មុនប្រទេសរុស្ស៊ីបាននិយាយថា យោធារបស់ខ្លួនបានបាញ់ព្រមានទៅលើនាវាចម្បាំងអង់គ្លេស នៅពេលដែលវាកំពុងបើកចេញពីតំបន់គ្រីមៀ ។ ប្រទេសរុស្ស៊ីបាននិយាយទៀតថា នាវានេះបានរំលោភលើដែនទឹករបស់ប្រទេសនៅសមុទ្រខ្មៅ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រកឃើញឯកសារសម្ងាត់សំខាន់ៗរបស់នាវាចម្បាំង អង់គ្លេស ដែលគំរាមបាញ់ដោយ រុស្ស៊ី នៅចំណតឡានក្រុង