Donald Trump និងភរិយា និយាយបែបណា ក្រោយការផ្ទុះគ្រាប់បែកនៅ កាប៊ុល?

លោក Donald Trump និងលោកស្រី Melania Trump កាលពីថ្ងៃព្រហស្បតិ៍ បានចូលរួមរំលែកទុក្ខយ៉ាងក្រៀមក្រំបំផុត ចំពោះសមាជិកយោធាអាមេរិកទាំង ១៣ នាក់ ដែលបានស្លាប់នៅក្នុងការបំផ្ទុះគ្រាប់បែកនៅទីក្រុង កាប៊ុល។

អតីតប្រធានាធិបតីអាមេរិក បាននិយាយក្នុងសេចក្តីថ្លែងការណ៍មួយថា “លោកស្រី Melania និងខ្ញុំ សូមចូលរួមរំលែកទុក្ខយ៉ាងជ្រាលជ្រៅបំផុត ចំពោះក្រុមគ្រួសារនៃសមាជិកយោធាដ៏ក្លាហាននិងអង់អាចរបស់យើង ដែលកាតព្វកិច្ចរបស់ពួកគេចំពោះសហរដ្ឋអាមេរិក មានន័យយ៉ាងខ្លាំងចំពោះពួកគេ។ យើងក៏សូមរំលែកទុក្ខដល់ ក្រុមគ្រួសារជនស៊ីវិលស្លូតត្រង់ដែលបានស្លាប់នៅថ្ងៃនេះ ក្នុងការវាយប្រហារដ៏ឃោរឃៅនៅទីក្រុងកាប៊ុលដែរ”។

លោកបានបន្ថែមថា “សោកនាដកម្មនេះ មិនគួរត្រូវបានអនុញ្ញាតឲ្យកើតឡើង ដែលធ្វើឲ្យយើងមានទុក្ខព្រួយកាន់តែខ្លាំងឡើយ”។

លោក Trump បានរិះគន់យ៉ាងខ្លាំងលើការដោះស្រាយរបស់លោកប្រធានាធិបតី Joe Biden ចំពោះស្ថានការណ៍នៅអាហ្វហ្គានីស្ថាន រួមទាំងការជម្លៀសជនជាតិអាមេរិកដែលឈរជើងនៅទីនោះ និងសម្ព័ន្ធមិត្តអាហ្វហ្គានីស្ថានរបស់ពួកគេផងដែរ។

ស្របពេលជាមួយគ្នានោះ លោកស្រី Melania Trump បានបង្ហោះ Twitter ថា “យើងអធិស្ឋានសម្រាប់គ្រួសារនិងមនុស្សជាទីស្រលាញ់របស់វីរបុរសកងម៉ារីន ដែលត្រូវបានសម្លាប់នៅទីក្រុងកាប៊ុលនិងសម្រាប់អ្នករាល់គ្នាដែលកំពុងរងទុក្ខក្នុងគ្រាដ៏លំបាកនេះ”។

ក្រុមមន្រ្តីអាមេរិកបានប្តេជ្ញាបន្តបេសកកម្មជម្លៀសប្រជាជនអាហ្វហ្គានីស្ថាន បើទោះបីជាក្រុម ISIS បានសម្លាប់ទាហាន ១៣ នាក់កាលពីថ្ងៃព្រហស្បតិ៍ ក្នុងការបំផ្ទុះគ្រាប់បែកពីរដងនៅអាកាសយានដ្ឋានក្រុងកាប៊ុលក៏ដោយ ហើយបានប្តេជ្ញាតាមប្រមាញ់ភេរវករដែលទទួលខុសត្រូវចំពោះការវាយប្រហារនេះ។

យ៉ាងណាក្តី អតីតទីប្រឹក្សាសន្តិសុខជាតិរបស់លោក Trump គឺលោក H.R. McMaster បានព្រមានថា នឹងមានការវាយប្រហារជាច្រើនទៀតកើតឡើង៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ តាលីបង់ បញ្ជាក់ច្បាស់ៗពីស្ថានភាពក្រុមខ្លួនក្នុងការបំផ្ទុះគ្រាប់បែកនៅព្រលានយន្តហោះក្រុងកាប៊ុល