វៀតណាម នឹងរងភ្លៀងធ្លាក់ខ្លាំងរហូតដល់ចុងខែ ហើយអាចជួបព្យុះ ៣ ទៀតនៅឆ្នាំនេះ

មជ្ឈមណ្ឌលជាតិសម្រាប់ការព្យាករណ៍ឧតុនិយម (NCHF) បាននិយាយថា ភ្លៀងធ្លាក់ខ្លាំងនឹងបន្តអូសបន្លាយនៅភាគកណ្តាលប្រទេសវៀតណាមរហូតដល់ចុងខែវិច្ឆិកា ហើយទំនងជានឹងរងការវាយប្រហារដោយព្យុះចំនួន ៣ បន្ថែមទៀតនៅឆ្នាំនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមលោក Tran Quang Nang មន្ត្រីមកពី NCHF បានឲ្យដឹងថា ភាពត្រជាក់ខ្លាំងបានធ្វើឲ្យមានភ្លៀងធ្លាក់យ៉ាងខ្លាំងនៅទូទាំងខេត្តភាគកណ្តាលក្នុងរយៈពេលប៉ុន្មានថ្ងៃកន្លងមកនេះ ។

លោក Nang បន្ថែមថា ចាប់ពីថ្ងៃទី ១១ ដល់ថ្ងៃទី ១៤ ខែវិច្ឆិកា ភ្លៀងនឹងបន្តធ្លាក់មកលើតំបន់ជាច្រើន ជាពិសេសតំបន់កណ្តាល និងភាគខាងត្បូងជាដើម ។

ទន្ទឹមនោះទឹកភ្លៀងទំនងជានឹងឡើងដល់កម្រិត ១០០ ទៅ ២៥០ មីលីម៉ែត្រនៅខេត្ត Thua Thien ខេត្ត Hue ខេត្ត Da Nang ខេត្ត Quang Nam និងខេត្ត Khanh Hoa និងរហូតដល់ ៦៥០ មីលីម៉ែត្រពីខេត្ត Quang Nam ដល់ខេត្ត Phu Yen ។

លោក Nang បានព្រមានថា អាកាសធាតុបែបនេះនឹងបង្កហានិភ័យខ្ពស់នៃការជន់លិចនៅតំបន់ទំនាប ក៏ដូចជាទឹកជំនន់ភ្លាមៗ និងការរអិលបាក់ដីនៅតំបន់ភ្នំ ។ លោកបានព្យាករណ៍ថា “ចាប់ពីពេលនេះរហូតដល់ដំណាច់ឆ្នាំនេះ វៀតណាមអាចនឹងរងការវាយប្រហារដោយព្យុះត្រូពិចពីរ ឬបីដែលទំនងជាក្លាយជាខ្យល់ព្យុះ” ។

គួរបញ្ជាក់ថា តំបន់ភាគកណ្ដាលប្រទេសវៀតណាម ទំនងជារងការវាយប្រហារដោយភ្លៀងធ្លាក់ខ្លាំងពេញមួយខែវិច្ឆិកានេះ ហើយកម្រិតទឹកភ្លៀងខ្ពស់បំផុតនឹងកត់ត្រារវាងខេត្ត Quang Binh ភាគខាងជើង និងខេត្ត Khanh Hoa ភាគខាងត្បូង ៕

ប្រែសម្រួលដោយ ៖ ជីវ័ន្ត

ប្រភព ៖ Tuoi Tre

ចុចអាន ៖ ថៃ ព្រមាន ក្រុងបាងកក នឹងជួបសីតុណ្ហភាពចុះត្រជាក់បំផុតដល់ ១ អង្សាសេ