ទីបំផុត អាមេរិក រកឃើញករណីដំបូង នៃវីរុសបំប្លែងខ្លួន Omicron (មានវីដេអូ)

សហរដ្ឋអាមេរិកបានរាយការណ៍អំពីករណីដែលត្រូវបានបញ្ជាក់ជាលើកដំបូងនៃ វីរុសកូវីដ១៩បំប្លែងខ្លួនប្រភេទថ្មី Omicron។ នេះបើតាមការបញ្ជាក់ពីមជ្ឈមណ្ឌលគ្រប់គ្រង និងបង្ការជំងឺ (CDC)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

CDC បាននិយាយនៅក្នុងសេចក្តីថ្លែងការណ៍មួយកាលពីថ្ងៃពុធថា ករណីត្រូវបានបញ្ជាក់លើមនុស្សម្នាក់នៅក្នុងរដ្ឋកាលីហ្វ័រញ៉ា ដែលត្រឡប់មកពីអាហ្វ្រិកខាងត្បូងកាលពីថ្ងៃទី២២ខែវិច្ឆិកា។

មនុស្សដែលមិនត្រូវបានគេបញ្ចេញអត្តសញ្ញាណរូបនេះ បានទទួលវ៉ាក់សាំងពេញលេញ ហើយកំពុងចេញរោគសញ្ញាស្រាល។

លោកវេជ្ជបណ្ឌិត Anthony Fauci ប្រធានផ្នែកជំងឺឆ្លងរបស់សហរដ្ឋអាមេរិក បានប្រាប់អ្នកយកព័ត៌មាននៅសេតវិមានថា “បុគ្គលរូបនោះ ត្រូវបានដាក់ឲ្យនៅដាច់ដោយឡែក ហើយអ្នកមានទំនាក់ទំនងជិតស្និទ្ធជាមួយបុគ្គលរូបនេះ ត្រូវបានទាក់ទង”។

គួរបញ្ជាក់ជាថ្មីថា អង្គការសុខភាពពិភពលោក (WHO) កាលពីថ្ងៃទី ២៦ ខែវិច្ឆិកា បានប្រកាស Omicron ជា “វីរុសបំប្លែងខ្លួនគួរឲ្យព្រួយបារម្ភ” បន្ទាប់ពីអ្នកជំនាញសុខភាពនៅអាហ្រ្វិកខាងត្បូងបានរកឃើញមេរោគថ្មីនេះជាលើកដំបូង។

ក្រុមប្រឹក្សាយោបល់របស់ WHO បាននិយាយថា ភស្តុតាងដំបូងបង្ហាញថា វីរុសបំប្លែងខ្លួនលេខកូដ B.1.1529 មួយនេះ មានលទ្ធភាពបង្កហានិភ័យខ្ពស់នៃការឆ្លងឡើងវិញ បើធៀបនឹងវីរុសបំប្លែងខ្លួនប្រភេទផ្សេងទៀត។

ឥឡូវនេះ Omicron ត្រូវបានរកឃើញនៅក្នុងប្រទេសជាង ២០ហើយទូទាំងពិភពលោក៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Al Jazeera

ចុចអាន៖ ថៃ តាមរកទេសចរអាហ្វ្រិកជិត ៨០០នាក់ ដើម្បីតេស្តរក Omicron ក្នុងនោះ មានខ្លះចាកចេញពីប្រទេសបាត់ហើយ