សារឆ្លើយឆ្លងចុងក្រោយរវាងទាហានរុស្ស៊ី ជាមួយម្តាយមុនពេលស្លាប់ អានហើយរំជួលចិត្ត

ឯកអគ្គរដ្ឋទូតអ៊ុយក្រែនប្រចាំអង្គការសហប្រជាជាតិកាលពីថ្ងៃចន្ទទី២៨ខែកុម្ភៈ បានអាននូវអ្វីដែលលោកនិយាយថា ជាសារចុងក្រោយពីទាហានរុស្ស៊ីម្នាក់ ផ្ញើទៅកាន់ម្តាយរបស់គាត់ ដោយសារនោះ បានពិពណ៌នាអំពីភាពភ័យរន្ធត់របស់គាត់ ចំពោះសង្រ្គាមដែលកើតឡើងមុនពេលគាត់ត្រូវបានគេសម្លាប់។

លោកបានអានសារនេះ ក្នុងអំឡុងសម័យប្រជុំបន្ទាន់នៃមហាសន្និបាតអង្គការសហប្រជាជាតិ ដើម្បីពិភាក្សាអំពីការវាយលុករបស់រុស្ស៊ីលើអ៊ុយក្រែន។

តំណាងប្រទេសអ៊ុយក្រែន លោក Sergiy Kyslytsya បានធ្វើការអង្វរដោយអន្ទះសារសុំជំនួយខណៈកាន់ក្រដាសមួយសន្លឹកនៃសាររបស់ទាហាន ដែលថតចេញពីអេក្រង់ទូរសព្ទ។

សារនោះបានចាប់ផ្តើមជាមួយពាក្យថា “ម៉ាក់ ខ្ញុំមិននៅគ្រីមៀទៀតទេ។ ខ្ញុំមិនមែននៅក្នុងការហ្វឹកហាត់ទៀតឡើយ”។ ម្ដាយ​ក៏​សួរកូន​ថា “តើ​កូន​នៅ​ឯ​ណា? ប៉ាប៉ាសួរថា តើម៉ាក់អាចផ្ញើអីវ៉ាន់ឲ្យកូនបានទេ?”។

កូនក៏​ឆ្លើយ​ថា “តើ​អីវ៉ាន់​ប្រភេទ​ណា​ដែលម៉ាក់​អាច​ផ្ញើ​មក​ខ្ញុំ​បាន?”។ 

“តើ​កូន​កំពុង​និយាយ​អំពី​អ្វី? តើមានអ្វីកើតឡើង?”។ កូនឆ្លើយថា “ម៉ាក់ ខ្ញុំនៅអ៊ុយក្រែន”។

“មានសង្រ្គាមពិតប្រាកដមួយកំពុងឆាបឆេះនៅទីនេះ។ ខ្ញុំ​ខ្លាច យើង​កំពុង​ទម្លាក់​គ្រាប់បែក​លើ​ទីក្រុង​ទាំង​អស់​ដំណាល​គ្នា សូម្បី​តែលើ​ជន​ស៊ីវិល។ យើងត្រូវបានគេប្រាប់ថា ពួកគេនឹងស្វាគមន៍យើង ហើយពួកគេដេកនៅក្រោមរថពាសដែករបស់យើង ហើយមិនអនុញ្ញាតឲ្យយើងឆ្លងកាត់ទេ។ ពួកគេហៅយើងថា ហ្វាស៊ីស។ ម៉ាក់ វាពិតជាពិបាកណាស់”។

លោក Kyslytsya បានបញ្ចប់ការតបសាររវាងម្តាយនិងកូន ដោយនិយាយថា សារចុងក្រោយត្រូវបានផ្ញើ មុនពេលទាហានត្រូវបានសម្លាប់។

ទោះបីជាយ៉ាងណាក៏ដោយ ព័ត៌មានលម្អិតនៃសារនេះ មិនអាចត្រូវបានផ្ទៀងផ្ទាត់បានភ្លាមៗទេ។

គួរបញ្ជាក់ថា ក្នុងសង្គ្រាមរយៈពេល៥ថ្ងៃមកនេះ ក្រសួងការពារជាតិអ៊ុយក្រែននិយាយថា រុស្ស៊ីបានបាត់បង់ទាហានចំនួន ៥ ៣០០នាក់, យន្តហោះ២៩គ្រឿង, ឧទ្ធម្ភាគចក្រ២៩គ្រឿង និងរថក្រោះ១៥១គ្រឿង។

ក្រសួងការពារជាតិ របស់រុស្ស៊ីបានទទួលស្គាល់ការបាត់បង់ជាលើកដំបូង ប៉ុន្តែបដិសេធបញ្ចេញតួលេខពិតប្រាកដ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ តារាម៉ូដែលម្នាក់ សន្យារួមភេទជាមួយទាហានរុស្ស៊ីគ្រប់រូប ដែលប្រឆាំងបញ្ជាលោក ពូទីន