រុស្ស៊ី វាយដណ្តើមបានទីក្រុងសំខាន់លើកដំបូង ចាប់តាំងពីលុកលុយអ៊ុយក្រែន (មានវីដេអូ)

កងកម្លាំងរុស្ស៊ី បានដណ្តើមកាន់កាប់ទីក្រុងកំពង់ផែដ៏សំខាន់មួយ នៅភាគខាងត្បូងប្រទេស អ៊ុយក្រែន។

Kherson គឺជាទីក្រុងសំខាន់ដំបូងគេ ដែលត្រូវរុស្ស៊ីដណ្តើមបាន បន្ទាប់ពីមានការប្រយុទ្ធគ្នាយ៉ាងខ្លាំងក្លា ចាប់តាំងពីខ្លួនបើកការលុកលុយកាលពីមួយសប្តាហ៍មុន។

អភិបាលក្រុង លោក Igor Kolykhaev និយាយថា ទាហានរុស្ស៊ីបានសម្រុកចូលទៅក្នុងអគារក្រុមប្រឹក្សាក្រុង និងដាក់បម្រាមគោចរលើប្រជាពលរដ្ឋ។

នៅក្នុងការបង្ហោះ Facebook លោក Kolykhaev បានសរសេរថា កងកម្លាំងរុស្ស៊ីកំពុងគ្រប់គ្រងទីក្រុង Kherson ដែលជាកំពង់ផែមួយនៅឆ្នេរសមុទ្រខ្មៅភាគខាងត្បូងប្រទេសអ៊ុយក្រែន ជាមួយប្រជាជនជាង ២៨០ ០០០នាក់។

ស្របពេលជាមួយគ្នានោះ​ លោក​បានអំពាវនាវដល់​ទាហាន​រុស្ស៊ី ​កុំ​ឲ្យ​បាញ់ទៅ​លើ​ជន​ស៊ីវិល ដោយ​និយាយ​ថា ​គ្មាន​កង​កម្លាំង​អ៊ុយក្រែន​នៅ​ក្នុង​ទីក្រុង​នោះ​ទេ។

លោក Kolykhaev ក៏បានអំពាវនាវដល់ប្រជាពលរដ្ឋ ឲ្យអនុវត្តតាមលក្ខខណ្ឌដែលកំណត់ដោយកងកម្លាំងរុស្ស៊ីផងដែរ ដែលមានដូចជា៖

• គោរពតាមបម្រាមគោចរដ៏តឹងរ៉ឹង ចាប់ពីម៉ោង ០៨:០០ យប់ដល់ម៉ោង ០៦:០០ ព្រឹក

• ចេញក្រៅជាក្រុមដែលមានមនុស្សតិចបំផុត ២នាក់។

• អនុញ្ញាតឲ្យតែរថយន្តដែលដឹកអាហារ ថ្នាំពេទ្យ និងគ្រឿងផ្គត់ផ្គង់ផ្សេងទៀតប៉ុណ្ណោះចូលទីក្រុង ដោយបើកបរក្នុងល្បឿនអប្បបរមា

គួរបញ្ជាក់ថា ការវាយយកបានទីក្រុង Kherson គឺមានសារៈសំខាន់បំផុត ព្រោះវាអាចអនុញ្ញាតឲ្យរុស្ស៊ី បង្កើតមូលដ្ឋានសម្រាប់យោធានៅទីនោះ ខណៈពួកគេព្យាយាមរុលចូលទៅមុខបន្ថែមទៀត៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ ស្ថានការណ៍មិនស្រួល! ប្រទេសមួយទៀត ដាក់ពាក្យសុំចូលជាសមាជិក EU បន្ទាន់