ថៃ​​នឹង​​​រៀប​​ចំ​​ពិធី​​បុណ្យ​​ចូល​​ឆ្នាំ​​ថ្មី​​​អនុញ្ញាតសកម្មភាព​​កម្សាន្ត​​ទាំង​អស់

រដ្ឋាភិបាល​ថៃ​បាន​និយាយ​ថា នឹង​រៀប​ចំ​ពិធី​បុណ្យ​ចូល​ឆ្នាំ​ថ្មី​ដែល​នឹង​ប្រព្រឹត្ត​ទៅ​នា​ខែ​មេសាខាង​មុខ​ បន្ទាប់​ពី​ផ្អាក​រយៈ​ពេល​២​​ឆ្នាំ​ដោយ​សារ​វិបត្តិ​កូវីដ-១៩ ប៉ុន្តែ​​​នៅ​តែ​​​ត្រូវ​ការ​​វិធាន​ការ​សុខភាព និងសុវត្ថិភាព​​​បន្ថែម​ទើប​អនុញ្ញាត។

អ្នក​នាំ​ពាក្យ​រដ្ឋាភិបាល​ថៃ លោក Thanakorn Wangboonkongchana កាល​ពី​ថ្ងៃ​អង្គារ៍​បាន​​និយាយ​ថា លោក​នាយក​រដ្ឋ​មន្ត្រី ប្រាយុទ្ធ ចាន់-អ៊ូចា បាន​ផ្តល់​ការ​ធានា​ថា សកម្មភាពទាំង​អស់​ និង​ពិធី​បុណ្យ​​ទូទាំង​​ប្រទេស​​​នឹង​ត្រូវ​បាន​អនុញ្ញាត​កំឡុង​ពេល​ពិធី​បុណ្យ​ចូល​ឆ្នាំ​ថ្មី​រយៈ​ពេល​៣​ថ្ងៃ​ពី​ថ្ងៃទី​១៣​-១៥ ខែ​មេសា។

លោក Thanakorn បាន​បញ្ជាក់​ថា ប៉ុន្តែ​ការប្រារព្ធ​ សាធារណជន​ត្រូវ​តែ​អនុវត្ត​​​យ៉ាង​ខ្ជាប់​ខ្ជួន​ជា​មួយ​នឹង​​វ៉ាក់សាំង វិធី​បង្ការ​ជា​សកល ការ​កំណត់​ដោយ​គ្មាន​កូវីដ និងការ​ធ្វើ​តេស្ត ATK។

មជ្ឈមណ្ឌល​សម្រាប់​ការ​គ្រប់​គ្រង​ស្ថានភាព​ជំងឺ​កូវីដ-១៩ (CCSA) ​នឹង​ជួប​ប្រជុំ​​គ្នា​នា​ថ្ងៃ​ទី​១៨ ខែ​មីនា​នេះ​ដើម្បី​ពិភាក្សា​ពី​វិធាន​ការ​សុវត្ថិភាព​សុខភាព​សម្រាប់​ថ្ងៃ​ឈប់​សម្រាក​នៃ​ពិធី​បុណ្យ​ចូល​ឆ្នាំ​ថ្មី។

លោកនាយករដ្ឋ​មន្ត្រី ប្រាយុទ្ធ បាន​ស្នើ​ឡើង​យ៉ាង​ខ្លាំង​ថា ប្រជា​ជន​គ្រប់​រូប​ដែល​គ្រោង​រៀប​ចំ និង​រីក​រាយ​ពិធី​បុណ្យ​ចូល​ឆ្នាំ​ថ្មី​ហោច​ណាស់​​ត្រូវ​តែ​​ចាក់​វ៉ាក់សាំង​ដូស​ទី​៣ និង​ធ្វើ​តេស្តដោយ​ ATK ទាំង​មុន​ពេល​ពិធី និង​ក្រោយ​ពេល​ពិធី​ដែល​ពួក​គេ​បាន​រៀប​ចំ។

លោក Thanakorn បាន​និយាយ​ថា លោក​នាយករដ្ឋ​មន្ត្រី​ក៏​បាន​ជំរុញ​ឲ្យ​ក្រុម​​មនុស្ស​ដែល​ងាយ​រង​គ្រោះ ​អ្នក​​មាន​អាយុ​៦០​ឆ្នាំ​ឡើង​ ​អ្នក​​​មាន​ជំងឺ​ប្រចាំ​កាយ និង​ស្ត្រី​មាន​ផ្ទៃ​ពោះ​ត្រូវ​តែ​ចាក់​វ៉ាក់សាំង​ឲ្យ​ពេញដូស​មុន​ពេល​ពិធី​បុណ្យ​ចូល​មក​ដល់។

លោក​វេជ្ជបណ្ឌិត Opas Karnkawinpong អគ្គនាយក​​នាយកដ្ឋាន​គ្រប់​គ្រង​ជំងឺ បាន​និយាយ​ថា ការ​ឆ្លង​ជំងឺ​កូវីដ-១៩​អាច​ឈាន​ដល់​​កម្រិត​កំពូល ខណៈ​អត្រា​ឆ្លង ​ដែល​ធ្វើ​តេស្ត​ដោយ RT-PCR និង​ ATK ​បាន​ធ្លាក់​ចុះ​​ក្នុង​រយៈ​ពេល​ពីរ​បី​ថ្ងៃចុង​ក្រោយ​នេះ។

លោក​បន្ថែម​ថា រហូតដល់​ពេល​នេះ  អត្រា​ឆ្លង នៅ​ក្នុង​ប្រទេសជា​ច្រើន​រាប់ទាំង​​​ថៃ​ផងមិន​ទាន់​ឈាន​ដល់​៦០-៧០​%​នៃ​ប្រជា​ជន​របស់​ពួក​គេ​ឡើយ៕

ប្រែ​សម្រួល៖ វីរបុត្រ
ប្រភព៖ bangkokpost