ជួយអ៊ុយក្រែនច្រើនទៅៗ អង់គ្លេស ឈានដល់ការបញ្ចេញខ្ទង់ចំណាយយោធាខ្ពស់បំផុត ដល់ថ្នាក់ដកលុយពីទុនបម្រុង

ជំនួយផ្នែកយោធារបស់អង់គ្លេស ក្នុងទំហំទឹកប្រាក់ ១.៣ពាន់លានផោន (ជាង១.៦ ពាន់លានដុល្លារ) បន្ថែមទៀត នឹងត្រូវផ្តល់ទៅឲ្យកងកម្លាំងអ៊ុយក្រែន ស្របពេលពួកគេប្រយុទ្ធប្រឆាំងនឹងការលុកលុយរបស់រុស្ស៊ី។

ការបង្កើនជំនួយរបស់អង់គ្លេសសម្រាប់កងកម្លាំងរបស់លោក Volodymyr Zelensky គឺជាអត្រាខ្ពស់បំផុតនៃការចំណាយយោធារបស់ចក្រភពអង់គ្លេសលើជម្លោះ ចាប់តាំងពីយុទ្ធនាការនៅក្នុងប្រទេសអ៊ីរ៉ាក់ និងអាហ្វហ្គានីស្ថាន។

ទឹកប្រាក់ ១.៣ពាន់លានផោន ដែលដកចេញពីទុនបម្រុងរបស់ចក្រភពអង់គ្លេស គឺរួមបញ្ចូលទាំងឧបករណ៍យោធាក្នុងទំហំទឹកប្រាក ៣០០លានផោនដែលសន្យាដោយលោក Boris Johnson កាលពីដើមសប្តាហ៍នេះផងដែរ។

លោក Johnson, ប្រធានាធិបតីសហរដ្ឋអាមេរិក Joe Biden និងមេដឹកនាំមកពីប្រទេស G7 ផ្សេងទៀត នឹងជួបពិភាក្សាជាមួយប្រធានាធិបតីអ៊ុយក្រែនលោក Zelenskyy នៅថ្ងៃអាទិត្យទី៨ខែឧសភានេះ ដើម្បីពិភាក្សាអំពីការគាំទ្របន្ថែមតាមសំណើ។

ឧបករណ៍យោធាដែលសន្យាដោយលោក Johnson រួមមាន ប្រព័ន្ធរ៉ាដាប្រឆាំងមីស៊ីលដើម្បីកំណត់គោលដៅកាំភ្លើងធំរបស់រុស្សី, ឧបករណ៍បិទ GPS និងឧបករណ៍មើលឃើញពេលយប់។

ព័ត៌មាននេះកើតឡើង ចំពេលឧបនាយករដ្ឋមន្ត្រីអ៊ុយក្រែនលោកស្រី Iryna Vereshchuk បាននិយាយថាស្ត្រី កុមារ និងមនុស្សចាស់ទាំងអស់ដែលនៅសេសសល់ អាចចាកចេញពីរោងចក្រដែក Azovstal នៅក្នុងទីក្រុង Mariupol បានហើយ។

លោកស្រីបានឲ្យដឹងថា “បទបញ្ជារបស់ប្រធានាធិបតីត្រូវបានអនុវត្ត។ ស្ត្រី កុមារ និងមនុស្សចាស់ទាំងអស់ត្រូវបានជម្លៀសចេញពីរោងចក្រ Azovstal។ ផ្នែកនៃប្រតិបត្តិការមនុស្សធម៌ Mariupol បានបញ្ចប់ហើយ”៕

ប្រែសម្រួល៖ Vann Vann

ប្រភព៖​ SKY

ចុចអាន៖ អ៊ុយក្រែន បាញ់កម្ទេចរថក្រោះទំនើបបំផុត តម្លៃ៥លានដុល្លារ របស់រុស្ស៊ី