ម៉ាឡេស៊ី នឹងផ្អាកនាំចេញមាន់រាប់លានតោន ទុកផ្គត់ផ្គង់ក្នុងប្រទេស

ប្រទេសម៉ាឡេស៊ីនឹងផ្អាកការនាំចេញមាន់ចំនួន ៣.៦ លានតោនក្នុងមួយខែ ចាប់ពីថ្ងៃទី១ ខែមិថុនាតទៅ ខណៈដែលប្រទេសនេះប្រឈមមុខនឹងការខ្វះខាតសាច់មាន់ រួមជាមួយនឹងតម្លៃឡើងខ្ពស់ជាដើម ។

នាយករដ្ឋមន្ត្រីម៉ាឡេស៊ីលោក Ismail Sabri Yaakob បាននិយាយថា ការហាមឃាត់ការនាំចេញសត្វមាន់នេះនឹងដំណើរការរហូតដល់ការផលិត និងតម្លៃសាច់ក្នុងប្រទេសមានស្ថិរភាពវិញ ។

ចំណាត់ការនេះដែរ​បាន​បង្កើន​ក្តីបារម្ភ​សម្រាប់​ប្រទេស​សិង្ហបុរី ដែល​ពឹងផ្អែក​ខ្លាំង​លើ​ការផ្គត់ផ្គង់​អាហារ​របស់ម៉ាឡេស៊ី ។ យោងតាមទិន្នន័យរបស់ទីភ្នាក់ងារអាហារសិង្ហបុរីបានឲ្យដឹងថា ប្រហែលមួយភាគបីនៃការផ្គត់ផ្គង់សាច់មាន់របស់សិង្ហបុរីក្នុងឆ្នាំ ២០២១ ត្រូវបាននាំចូលពីប្រទេសម៉ាឡេស៊ី ខណៈទីផ្សារនាំចេញសាច់មាន់ផ្សេងទៀតរបស់ម៉ាឡេស៊ីរួមមានប្រទេសថៃ ជប៉ុន និងហុងកុង ។

លោក Yakoob បាននិយាយថា បន្ថែមពីលើវិធានការកែសម្រួលការនាំចេញ អាជ្ញាធរម៉ាឡេស៊ីនឹងស្វែងរកការបង្កើនផលិតកម្មមាន់ ដកការអនុញ្ញាតនាំចូលមួយចំនួន និងស៊ើបអង្កេតពាក់ព័ន្ធនឹងការដំឡើងថ្លៃសាច់មាន់ជាដើម ។

គួរបញ្ជាក់ថា ម៉ាឡេស៊ី​ជា​ប្រទេស​ចុង​ក្រោយ​បំផុត​ដែល​ដាក់​កំហិត​លើ​ការ​នាំ​ចេញ​អាហារ​ដើម្បី​ឆ្លើយ​តប​នឹង​ការ​ឡើង​ថ្លៃ ខណៈ​ឥណ្ឌូណេស៊ីក៏​ផ្អាក​ការ​នាំ​ចេញ​ប្រេងដូងផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Vietnam Plus