នេះមូលហេតុទ្វីបអាហ្វ្រិកនៅតែបន្តផ្ទុះ ជំងឺអុតស្វា ប្រទេសខ្លះមានទាំង អ្នកស្លាប់

រហូតមកដល់ពេលនេះតំបន់ជាច្រើនលើពិភពលោកកំពុងផ្ទុះជំងឺអុតស្វាធ្ងន់ធ្ងរ ជាពិសេសអាហ្វ្រិកខាងលិច និងកណ្ដាល ហើយវាក៏ក្លាយជារោគរាតត្បាតដ៏អាក្រក់មួយទៀតផងដែរក្នុងទ្វីបអាហ្វ្រិក ។

ទន្ទឹមនោះលោកវេជ្ជបណ្ឌិត Aime Alongo ប្រធានផ្នែកសុខភាពទីក្រុង Sankuru ក្នុងប្រទេសកុងហ្គោបាននិយាយថា ការ​បន្ត​កើត​ជំងឺ​អុតស្វា​នៅអាហ្វ្រិក គឺ​ដោយសារតែ​ការ​ស៊ីសត្វ​ស្វា និង​សត្វ​កកេរ​ងាប់ ។

មន្ត្រីរូបនេះបានបន្ថែមថា “អ្នកស្រុកបានចូលទៅក្នុងព្រៃ ហើយយកសាកសពសត្វស្វា ប្រចៀវ និងសត្វកកេរ ដែលផ្ទុកទៅដោយជំងឺអុតស្វា ដើម្បីបរិភោគជាអាហារ ។ ក្រោយមកពួកគេបានចេញរោគសញ្ញា ហើយក្រសួងសុខាភិបាលក៏បានបញ្ជាឲ្យពួកគេដាក់ខ្លួនឲ្យនៅដាច់ដោយឡែកផងដែរ ដើម្បីតាមដានអាការរោគ” ។

ទាក់ទិននឹងបញ្ហានេះដែរ អាជ្ញាធរសុខាភិបាលរបស់ប្រទេសកុងហ្គោថ្មីៗនេះបាននិយាយថា មនុស្សចំនួន ៩ នាក់បានស្លាប់ ដោយសារជំងឺអុតស្វាដែលកំពុងផ្ទុះឡើងក្នុងប្រទេសនៅឆ្នាំ ២០២២ នេះ ស្របពេលដែលនីហ្សេរីយ៉ាក៏បានកត់ត្រាការស្លាប់លើកដំបូងរបស់ខ្លួន ដោយសារជំងឺនេះនៅឆ្នាំនេះផងដែរ ។

ចំណែកនៅក្នុងទ្វីបអឺរ៉ុប និងសហរដ្ឋអាមេរិកវិញ ការរីករាលដាលនៃករណីជំងឺអុតស្វានាពេលបច្ចុប្បន្នក៏បានបង្កើតឲ្យមានការព្រួយបារម្ភក្នុងចំណោមប្រទេសទាំងនោះផងដែរ ខណៈអង្គការសុខភាពពិភពលោក (WHO) បាននិយាយថា ករណីជាង ២៥០ នៃជំងឺអុតស្វាត្រូវបានរាយការណ៍នៅក្នុងប្រទេសមិនធ្លាប់មានប្រវត្តិផ្ទុះជំងឺជាង ២០ ហើយ ៕

ប្រែសម្រួលដោយ ៖ ជីវ័ន្ត

ប្រភព ៖ Daily Sabah

ចុចអាន ៖ ប្រទេស ២ នៅអាហ្វ្រិកប្រកាសមានអ្នកស្លាប់ ដោយសារជំងឺអុតស្វា