ញូវយ៉ក បង្កើនអាយុ អ្នកមានសិទ្ធិ ទិញកាំភ្លើងពាក់កណ្តាលស្វ័យប្រវត្តិ

អភិបាលរដ្ឋញូវយ៉ក បានដំឡើងអាយុសម្រាប់អ្នកមានសិទ្ធិទិញកាំភ្លើងពាក់កណ្តាលស្វ័យប្រវត្តិពី ១៨ ដល់ ២១ ឆ្នាំ ខណៈលោកស្រី រឹតបន្តឹងច្បាប់កាំភ្លើង បន្ទាប់ពីការសម្លាប់រង្គាលរើសអើងជាតិសាសន៍នៅផ្សារទំនើបមួយក្នុងទីក្រុង Buffalo។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Kathy Hochul បានយល់ព្រមលើកញ្ចប់នៃច្បាប់កំណែទម្រង់កាំភ្លើង ដែលត្រូវបានអនុម័តដោយព្រឹទ្ធសភារដ្ឋ បន្ទាប់ពីមានការបាញ់ប្រហារកាលពីខែមុន ដែលបានសម្លាប់ជនស្បែកខ្មៅចំនួន១០នាក់។

វិធានការនេះ កើតឡើងចំពេលមានជម្លោះ ពាក់ព័ន្ធការសម្លាប់រង្គាលនៅក្នុងសហរដ្ឋអាមេរិក ដែលបានបង្កឲ្យមានការអំពាវនាវជាថ្មី សម្រាប់ច្បាប់គ្រប់គ្រងកាំភ្លើង កាន់តែតឹងរ៉ឹង។

Payton Gendron អាយុ ១៨ ឆ្នាំ ត្រូវបានចោទប្រកាន់ពីបទបាញ់ប្រហារអ្នកទិញទំនិញនៅផ្សារ Tops Friendly Market ដោយប្រើកាំភ្លើង AR-15 ដែលគាត់បានទិញដោយស្របច្បាប់។

ក្រៅពីមានអាយុយ៉ាងតិច២១ឆ្នាំ ឥឡូវនេះ អ្នកទិញកាំភ្លើងពាក់កណ្តាលស្វ័យប្រវត្តិ ក៏ត្រូវមានលិខិតអនុញ្ញាតដែរ ដែលនេះមានន័យថា ពួកគេត្រូវស្ថិតនៅក្រោមការត្រួតពិនិត្យសាវតារ។

គួរបញ្ជាក់ថា ច្បាប់មួយទៀតដែលចុះហត្ថលេខាដោយលោកស្រី Hochul បានដាក់កម្រិតលើការទិញអាវក្រោះការពារគ្រាប់ ចំពោះអ្នកអនុវត្តច្បាប់។

កញ្ចប់នេះក៏តម្រូវឲ្យក្រុមហ៊ុនប្រព័ន្ធផ្សព្វផ្សាយសង្គមដែលកំពុងប្រតិបត្តិការនៅទីក្រុងញូវយ៉ក ត្រូវដាក់ចេញនូវគោលនយោបាយតម្លាភាព អំពីរបៀបដែលពួកគេឆ្លើយតបទៅនឹងការនិយាយស្អប់ខ្ពើមនៅលើវេទិការបស់ពួកគេផងដែរ៕

ប្រែសម្រួល៖ Vann Vann

ប្រភព៖ CNA

ចុចអាន៖ បាញ់ប្រហារ ៣លើក ស្លាប់និងរបួសមនុស្សជាង ៣០នាក់ នៅ សហរដ្ឋអាមេរិក