អាមេរិក យល់ព្រមព្យាបាលទាហាន អ៊ុយក្រែន ដែលរងរបួសក្នុងសង្គ្រាម

អ្នកនាំពាក្យក្រសួងការពារជាតិអាមេរិកបានបញ្ជាក់ប្រាប់សារព័ត៌មាន Sputnik ថា មន្ទីរបញ្ចកោណបានអនុម័តផែនការព្យាបាលទាហានអ៊ុយក្រែនដែលរងរបួសនៅមន្ទីរពេទ្យយោធាអាមេរិកក្នុងប្រទេសអាល្លឺម៉ង់ ។

អ្នកនាំពាក្យក្រសួងការពារជាតិបាននិយាយកាលពីថ្ងៃអង្គារថា “ថ្មីៗនេះរដ្ឋមន្ត្រីការពារជាតិលោក Lloyd Austin បានយល់ព្រមការប្រើប្រាស់មជ្ឈមណ្ឌលវេជ្ជសាស្ត្រក្នុងតំបន់ Landstuhl ប្រទេសអាល្លឺម៉ង់សម្រាប់ការព្យាបាលដល់សមាជិកសេវាកម្មអ៊ុយក្រែន” ។

អ្នកនាំពាក្យបាននិយាយទៀតថា ប៉ុន្តែគិតត្រឹមរសៀលថ្ងៃអង្គារ មិនទាន់មានកងកម្លាំងអ៊ុយក្រែនណាម្នាក់ត្រូវបានព្យាបាលនៅមន្ទីរពេទ្យមួយនេះនៅឡើយទេ ប៉ុន្តែជម្រើសទទួលយកទាហានអ៊ុយក្រែននៅតែមានក្នុងគម្រោងរបស់យើង ។

អ្នកនាំពាក្យបានបន្ថែមថា សហរដ្ឋអាមេរិក រួមជាមួយដៃគូ និងសម្ព័ន្ធមិត្តក៏នឹងបន្តផ្តល់ការបណ្តុះបណ្តាលផ្នែកវេជ្ជសាស្រ្ត បរិក្ខារ និងការផ្គត់ផ្គង់ផ្សេងៗដើម្បីគាំទ្រដល់ប្រទេសអ៊ុយក្រែនផងដែរ ។

ចំណែកសារព័ត៌មាន CNN បានរាយការណ៍ដែរថា ទាហានអ៊ុយក្រែនដែលកំពុងស្វែងរកការព្យាបាលនៅមន្ទីរពេទ្យយោធាអាមេរិកក្នុងប្រទេសអាល្លឺម៉ង់ នឹងត្រូវចាកចេញពីអ៊ុយក្រែនតាមរថភ្លើង និងរថយន្ត ឬអាចជម្លៀសតាមអាកាសទៅកាន់មូលដ្ឋានទ័ពអាកាស Ramstein ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ចិន ៖ អាមេរិក គួរតែបង្កើតលក្ខខណ្ឌចរចាវិបត្តិនៅ អ៊ុយក្រែន គ្រាន់ជាងចាត់ទុក រុស្ស៊ី ជារដ្ឋឧបត្ថម្ភអំពើភេរវកម្ម