លោកស្រី Pelosi ការពារដំណើរទស្សនកិច្ចទៅ តៃវ៉ាន់ ក្រោយសរសើរ ចិន ពេញៗមាត់

ប្រធានសភាអាមេរិកលោកស្រី Nancy Pelosi បានការពារដំណើរទស្សនកិច្ចនាពេលថ្មីៗនេះរបស់លោកស្រីទៅកាន់កោះតៃវ៉ាន់ ដោយនិយាយថា “យើងមិនអាចអនុញ្ញាតឲ្យរដ្ឋាភិបាលចិនដាក់តៃវ៉ាន់ឲ្យនៅឯកោនោះទេ” ។

នៅក្នុងការផ្ដល់បទសម្ភាសន៍ដល់ទូរទស្សន៍ NBC កាលពីថ្ងៃអង្គារ លោកស្រី Pelosi បាននិយាយថា ទាំងប្រធានាធិបតី និង​ប្រជាជន​តៃវ៉ាន់សុទ្ធតែ​ស្វាគមន៍​ដំណើរ​ទស្សនកិច្ច​នេះ បើ​ទោះ​ជា​រដ្ឋាភិបាល​ចិន​មិន​បាន​ធ្វើ​ដូច្នេះក៏ដោយ ។

លោកស្រី Pelosi បញ្ជាក់ថា លោកស្រីមិនបានទៅតៃវ៉ាន់ដើម្បីផ្លាស់ប្តូរគោលនយោបាយរបស់សហរដ្ឋអាមេរិកនោះទេ យើងនៅតែគាំទ្រគោលនយោបាយ “ចិនតែមួយ” ហើយស្ថានភាពបច្ចុប្បន្នរបស់តៃវ៉ាន់គឺជាគោលនយោបាយរបស់យើង ។ លោកស្រីទៅទីក្រុងតៃប៉ិដើម្បីបង្ហាញការគាំទ្ររបស់សហរដ្ឋអាមេរិកចំពោះលទ្ធិប្រជាធិបតេយ្យនៅតៃវ៉ាន់” ។

លោកស្រីបាននិយាយថា ដំណើរទស្សនកិច្ចរបស់លោកស្រីគឺមានតម្លៃ បើទោះបីជាទីក្រុងប៉េកាំងឆ្លើយតបយ៉ាងចាស់ដៃដូចជា ការធ្វើសមយុទ្ធយោធាទ្រង់ទ្រាយធំ ក៏ដូចជាដាក់ទណ្ឌកម្មលើលោកស្រី និងក្រុមគ្រួសារក៏ដោយ ហើយលោកស្រីលម្អិតថា “អ្វីដែលចិនកំពុងធ្វើ គឺជាអ្វីដែលពួកគេធ្វើជាធម្មតាទៅហើយ” ។

ទន្ទឹមនោះ ការនិយាយការពារដំណើរទស្សនកិច្ចដ៏ចម្រូងចម្រាស់របស់លោកស្រី Pelosi ទៅកាន់កោះតៃវ៉ាន់កើតឡើងភ្លាមៗ បន្ទាប់ពីប្រធានសភាអាមេរិករូបនេះបានសរសើរពេញៗមាត់ដល់ប្រទេសចិនថាជា “សង្គមសេរីបំផុតមួយនៅក្នុងពិភពលោក” ។

ដំណើរទស្សនកិច្ចកាលពីសប្ដាហ៍មុនមកកាន់កោះតៃវ៉ាន់របស់លោកស្រី Pelosi បានទាក់ទាញការចាប់អារម្មណ៍យ៉ាងខ្លាំងលើសកលលោក ហើយក៏បង្កើនភាពតានតឹងកាន់តែខ្លាំងឡើងផងដែររវាងសហរដ្ឋអាមេរិក និងចិន ខណៈកាលពីពេលថ្មីៗនេះរដ្ឋាភិបាលទីក្រុងប៉េកាំងបានធ្វើសមយុទ្ធយោធាទ្រង់ទ្រាយធំជាបន្តបន្ទាប់ ក៏ដូចជាដាក់ទណ្ឌកម្មលើលោកស្រី Pelosi និងក្រុមគ្រួសារ ដើម្បីឆ្លើយតបទៅនឹងដំណើរទស្សនកិច្ចនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ក្រោយបញ្ចប់ដំណើរទស្សនកិច្ចនៅ តៃវ៉ាន់ លោកស្រី Pelosi សរសើរ ចិន ពេញៗមាត់