អាមេរិក​ បើកការ​វាយ​ប្រហារអាកាស លើក្រុម​យុទ្ធជនគាំទ្រ​ដោយ​ ​អ៊ីរ៉ង់ នៅ ស៊ីរី

យោធាអាមេរិក បានបើកការវាយប្រហារពីអាកាសជាច្រើនលើក លើគោលដៅនៅភាគខាងកើតប្រទេសស៊ីរី ដោយអះអាងថា ខ្លួនបានវាយប្រហារទីតាំងដែលប្រើប្រាស់ដោយក្រុមយុទ្ធជន គាំទ្រដោយអ៊ីរ៉ង់។

យោធាជឿថា ពួកគេជាអ្នកនៅពីក្រោយការវាយប្រហារដោយយន្តហោះគ្មានមនុស្សបើក លើមូលដ្ឋានអាមេរិកកាលពីដើមខែនេះ។

ទីបញ្ជាការកណ្តាលរបស់សហរដ្ឋអាមេរិក (CENTCOM) បានប្រកាសអំពីប្រតិបត្តិការនេះ នៅក្នុងសេចក្តីថ្លែងការណ៍មួយកាលពីយប់ថ្ងៃអង្គារទី២៣ខែសីហា ដោយនិយាយថា កងកម្លាំងសហរដ្ឋអាមេរិក បានបើកការវាយប្រហារពីអាកាស នៅក្នុងទីក្រុង Deir ez-Zor នៃប្រទេសស៊ីរីកាលពីពេលព្រឹក។

បញ្ជាការនេះនិយាយថា “ការវាយប្រហាររបស់សហរដ្ឋអាមេរិក បានសំដៅលើមូលដ្ឋានហេដ្ឋារចនាសម្ព័ន្ធដែលប្រើប្រាស់ដោយក្រុមជាប់ពាក់ព័ន្ធជាមួយកងឆ្មាំបដិវត្តន៍ឥស្លាមរបស់អ៊ីរ៉ង់។ ការវាយប្រហារដ៏ជាក់លាក់ទាំងនេះ មានគោលបំណងការពារខ្លួន និងការពារកងកម្លាំងសហរដ្ឋអាមេរិក ពីការវាយប្រហារប្រឆាំងយោធាអាមេរិក ដោយក្រុមដែលគាំទ្រដោយអ៊ីរ៉ង់ដូចកាលពីថ្ងៃទី ១៥ ខែសីហា”។

ទោះបីជាយ៉ាងណាក៏ដោយ សេចក្តីថ្លែងការណ៍នេះ មិនបានកំណត់អត្តសញ្ញាណគោលដៅណាមួយនៅក្នុងការវាយប្រហារ ឬផ្តល់ការប៉ាន់ស្មានចំនួនជនរងគ្រោះនោះទេ។

យោងតាមយោធា, ក្នុងឧបទ្ទវហេតុកាលពីថ្ងៃទី១៥ខែសីហា គេបានឃើញយន្តហោះគ្មានមនុស្សបើកជាច្រើនគ្រឿង បើកការវាយប្រហារលើបន្ទាយអាមេរិកក្នុងតំបន់ Al-Tanf ដែលជាយោធភូមិដាច់ស្រយាលនៅភាគខាងត្បូងប្រទេសស៊ីរី ក្បែរព្រំដែនជាប់ជាមួយហ្ស៊កដានី និងអ៊ីរ៉ាក់។

យន្តហោះគ្មានមនុស្សបើកទាំងនោះ មិនបណ្តាលឲ្យមានអ្នកស្លាប់ទេ ប៉ុន្តែមេបញ្ជាការជាន់ខ្ពស់អាមេរិកម្នាក់បាននិយាយថា ការវាយប្រហារ បានធ្វើឲ្យជីវិតជនស៊ីវិលស្លូតត្រង់របស់ស៊ីរីប្រឈមនឹងហានិភ័យ៕

ប្រែសម្រួល៖ Vann Vann

ប្រភព៖ RT