ឥណ្ឌូណេស៊ី រងការវាយប្រហារពីគ្រោះរញ្ជួយដីខ្លាំងក្លាមួយភ្លេត ៣ លើក

ការរញ្ជួយដីដ៏ខ្លាំងចំនួន ៣ លើកបានវាយប្រហារនៅឆ្នេរសមុទ្រនៃកោះស៊ូម៉ាត្រារបស់ប្រទេសឥណ្ឌូណេស៊ី បង្កឲ្យអ្នកស្រុកមានការភ័យស្លន់ស្លោយ៉ាងខ្លាំង ប៉ុន្តែមិនមានរបាយការណ៍ភ្លាមៗអំពីអ្នកស្លាប់ ឬការខូចខាតធ្ងន់ធ្ងរណាមួយនោះទេ ។

ទីភ្នាក់ងារឧតុនិយម និងភូគព្ភសាស្រ្តរបស់ប្រទេសឥណ្ឌូនេស៊ី (BMKG) បានកត់ត្រាការរញ្ជួយដីកម្រិត ៦.៥ រ៉ិចទ័រ នៅកោះ Mentawai នៅមុនម៉ោង ១០ និង ៣០ នាទីព្រឹកថ្ងៃចន្ទនេះ ប៉ុន្តែវាមិនបង្កឲ្យមានការព្រមានអំពីរលកយក្សស៊ូណាមិនោះទេ ។

ទន្ទឹមនោះ វាជាការរញ្ជួយដីលើកទី ៣ នៅក្នុងតំបន់ បន្ទាប់ពីការរញ្ជួយដីកម្រិត ៥.២ រ៉ិចទ័រត្រូវបានកត់ត្រានៅមុនថ្ងៃរះ ខណៈទី ២ មានកម្រិត ៥.៤ រ៉ិចទ័រ ពោលកើតឡើងប្រមាណមួយម៉ោងក្រោយមក ។

ទីភ្នាក់ងារគ្រោះមហន្តរាយបាននិយាយនៅក្នុងសេចក្តីថ្លែងការណ៍មួយថា ការរញ្ជួយដីកម្រិត ៦.៥ រ៉ិចទ័រ បានកើតឡើងជាច្រើនវិនាទីនៅក្នុងខេត្ត Padang និងនៅតំបន់ភ្នំជុំវិញនៃទីក្រុង Bukitinggi ។

គួរបញ្ជាក់ថា ឥណ្ឌូណេស៊ីបានជួបប្រទះជាញឹបញាប់នូវការរញ្ជួយដី និងគ្រោះធម្មជាតិផ្សេងៗ ដោយសារតែប្រទេសនេះស្ថិតក្នុងខ្សែរក្រវាត់ភ្នំភ្លើងប៉ាស៊ីហ្វិក “Ring of Fire” ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ លោក ប្រាយុទ្ធ បង្ហាញខ្លួនលើកដំបូង ក្រោយព្យួរតំណែង និងមិននិយាយ​មួយម៉ាត់​ទៅកាន់អ្នកសារព័ត៌មាន