តើខេត្ត ថៃ ណាខ្លះហើយកំពុងលិចលង់ដោយទឹកជំនន់?

បច្ចុប្បន្នខេត្តរបស់ប្រទេសថៃចំនួន ១៣ ហើយដែលកំពុងជួបគ្រោះទឹកជំនន់ ក្នុងនោះមានដូចជា ខេត្ត Phayao, Nan, Chiang Mai, Lamphun, Lampang, Phetchabun, Kalasin, Khon Kaen, Nong Bua Lam Phu, Pathum Thani, Samut Prakan, Rayong និងខេត្ត Chanthaburi ។

ក្រៅពីខេត្តទាំងនោះ ទីក្រុងបាងកកក៏កំពុងរងហានិភ័យពីទឹកជំនន់ទ្រង់ទ្រាយធំផងដែរ បន្ទាប់ពីមានភ្លៀងធ្លាក់ខ្លាំង រួមជាមួយនឹងកម្រិតទឹកទន្លេហក់ឡើងខ្ពស់ ។

ទោះយ៉ាងណា រហូតមកដល់ពេលនេះក៏មានការអន្តរាគមន៍ពីសំណាក់មន្ត្រីរដ្ឋាភិបាលផងដែរ ដោយក្នុងនោះរដ្ឋបាលទីក្រុងបាងកកបានដាក់ម៉ាស៊ីនបូមទឹកជាច្រើនគ្រឿងដើម្បីរំដោះទឹកចេញពីរាជធានី ។

បន្ថែមពីនេះកងទ័ពជើងទឹកថៃក៏បានដាក់ពង្រាយទូកចំនួន ២០ គ្រឿងផងដែរដើម្បីជួយបង្ហូរទឹកពីទន្លេ Prasae ចូលទៅក្នុងឈូងសមុទ្រថៃដើម្បីកាត់បន្ថយការជន់លិចនៅស្រុក Klaeng នៃខេត្ត Rayong បន្ទាប់ពីកម្រិតទឹកទន្លេបានហក់ឡើងខ្ពស់ ដោយសារតែភ្លៀងធ្លាក់ខ្លាំងឥតឈប់ឈរ ។

គួរបញ្ជាក់ថា ថ្មីៗនេះមជ្ឈមណ្ឌលធនធានទឹកជាតិរបស់ប្រទេសថៃបានចេញការព្រមានអំពីគ្រោះទឹកជំនន់ ជន់លិចទូទាំងប្រទេស ហើយក៏បានប្រាប់ដល់ប្រជាជនក្នុងខេត្តចំនួន ៥៦ រួមទាំងទីក្រុងបាងកក និងតំបន់ជាយក្រុងរបស់ខ្លួនឲ្យប្រុងប្រយ័ត្នបន្ថែមទៀតចំពោះទឹកទន្លេដែលហូរហៀរ ដោយសារតែភ្លៀងធ្លាក់ខ្លាំង ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ ឈៀងម៉ៃ ជួបគ្រោះរញ្ជួយដី ខណៈខេត្តភាគច្រើន ថៃ កំពុងមានទឹកជំនន់