Elon Musk ជួលអង្គរក្ស ១០០ នាក់ និងបំពាក់ឧបករណ៍សុវត្ថិភាពអស់ ១៤,៦០០ ដុល្លារដើម្បីការពារផ្ទះឪពុក

មហាសេដ្ឋីអាមេរិកលោក Elon Musk បានបង្កើនប្រព័ន្ធសន្តិសុខនៅផ្ទះរបស់ឪពុកលោកនៅក្នុងប្រទេសអាហ្វ្រិកខាងត្បូង ដោយបានជួលកងអង្គរក្សប្រហែល ១០០ នាក់ ចំពេលមានការភ័យខ្លាចថា ឪពុករបស់ខ្លួនអាចត្រូវបានចាប់ពង្រត់ ។

លោក Errol Musk ដែលជាឪពុករបស់ Elon Musk បាននិយាយថា “កូនប្រុសរបស់ខ្ញុំបានសម្រេចចិត្តធ្វើបែបនេះដើម្បីការពារខ្ញុំ បន្ទាប់ពីមានការគំរាមកំហែងនាពេលថ្មីៗនេះប្រឆាំងនឹងខ្ញុំនៅក្នុងប្រទេសអាហ្វ្រិកមួយនេះ” ។

លោក Errol Musk ក៏បានប្រាប់អ្នកសារព័ត៌មានដែរថា ក្រុមកូនប្រុសរបស់គាត់បានបង្កើនវិធានការសន្តិសុខ រួមទាំងដាក់ប្រព័ន្ធកាមេរ៉ាបច្ចេកវិទ្យាខ្ពស់ របងឆក់ និងឧបករណ៍ត្រួតពិនិត្យផ្សេងៗរបស់កងអង្គរក្សក្នុងផ្ទះរបស់គាត់នៅអាហ្វ្រិកខាងត្បូង ចាប់តាំងពីខែធ្នូ ឆ្នាំ ២០២២ ហើយសរុបជាទឹកប្រាក់ប្រហែល ១៤,៦០០ ដុល្លារ ។

ចាប់តាំងពីទិញបាន Twitter ក្នុងតម្លៃ ៤៤ ពាន់លានដុល្លារកាលពីខែតុលា ឆ្នាំ២០២២ មក, លោក Elon Musk បានជួបប្រទះនូវបញ្ហាស្មុគស្មាញជាច្រើន ជាពិសេសហេតុការណ៍កាលពីខែមុន មានមនុស្សដើរតាមរថយន្តដឹកកូនៗរបស់នៅក្នុងទីក្រុង Los Angeles ដោយសង្ស័យថា ពួកគេអាចនឹងធ្វើការចាប់ពង្រត់ណាមួយលើគ្រួសាររបស់លោក ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រកឃើញឯកសារសម្ងាត់បន្ថែមទៀតនៅផ្ទះរបស់លោក បៃដិន