អាមេរិក ប្រកាសធ្វើតេស្តមីស៊ីលល្បឿនលឿនជាងសំឡេង ២លើកក្នុងឆ្នាំនេះ ដើម្បីប្រជែងចិន និងរុស្ស៊ី (មានវីដេអូ)

លោក Douglas Bush ជំនួយការលេខាធិការទទួលបន្ទុកដឹកជញ្ជូន និងបច្ចេកវិទ្យាបាននិយាយថា កងទ័ពអាមេរិក​ នឹងអនុវត្តការសាកល្បងប្រព័ន្ធមីស៊ីលល្បឿនលឿនជាងសំឡេងថ្មីចំនួនពីរ នៅទីតាំងធ្វើតេស្ត White Sands ក្នុងរដ្ឋ New Mexico នារដូវក្តៅខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Bush បាននិយាយនៅឯមជ្ឈមណ្ឌលសន្តិសុខអាមេរិកថ្មី (CNAS) កាលពីថ្ងៃសុក្រទី០៣ខែមីនាថា “យើងនឹងមានការធ្វើតេស្តមីស៊ីលល្បឿនលឿនជាងសំឡេងចំនួនពីរលើកនៅ White Sands នារដូវក្តៅ។ វាស្ទើរតែដូចមីស៊ីលល្បឿនលឿនជាងសំឡេងទី១ ដែលត្រូវបានដាក់ពង្រាយទៅអង្គភាពកងទ័ព”។

យោងតាមលោក Bush, ការធ្វើតេស្តនេះនឹងធ្វើឡើងជាមួយកងទ័ពជើងទឹកសហរដ្ឋអាមេរិក ដែលកំពុងតែសហការក្នុងកម្មវិធីបង្កើតប្រព័ន្ធអាវុធល្បឿនលឿនជាងសំឡេង ដើម្បីតាមឲ្យទាន់ការជឿនលឿនដែលសម្រេចបានដោយរុស្ស៊ី និងចិន។

កាលពីថ្ងៃទី២៧ខែកុម្ភៈ លេខាកងទ័ពលោកស្រី Christine Wormuth បាននិយាយថា កងទ័ពនឹងដាក់ពង្រាយម៉ាស៊ីនអាវុធល្បឿនលឿនជាងសំឡេងរយៈចម្ងាយឆ្ងាយ (LRHW) ដំបូងបង្អស់របស់ខ្លួននៅរដូវស្លឹកឈើជ្រុះនេះ។

គួរបញ្ជាក់ថា សហរដ្ឋអាមេរិកបានធ្វើការសាកល្បងចុងក្រោយរបស់ខ្លួន លើមីស៊ីលល្បឿនលឿនជាងសំឡេងរបស់ក្រុមហ៊ុន Lockheed Martin កាលពីខែមករា ដោយមីស៊ីល Airbreathing បានឈានដល់ល្បឿនលឿនជាងសំឡេង៥ដង៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Sputnik

ចុចអាន៖ មីស៊ីលល្បឿនលឿនជាងសំឡេង ទំនើបបំផុតរបស់ចិន បង្ហាញខ្លួនក្នុងសមយុទ្ធ ជុំវិញកោះតៃវ៉ាន់