ការប៉ះទង្គិចគ្នាដោយហិង្សាបានផ្ទុះឡើងសាជាថ្មីម្តងទៀតនៅទីក្រុងប៉ារីស ប្រទេសបារាំង ដោយសារតែមិនពេញចិត្តទៅនឹងច្បាប់ដំឡើងអាយុចូលនិវត្តន៍របស់លោកប្រធានាធិបតី Emmanuel Macron ។

សាក្សីនៅកន្លែងកើតហេតុបានរៀបរាប់ថា ប៉ូលិសកុបកម្មបានវាយដំក្រុមបាតុករដែលកំពុងធ្វើការតវ៉ា បន្ទាប់ពីពួកគេមួយចំនួនបានដុតសំរាម និងគប់របស់របរដាក់ប៉ូលិសដែលកំពុងប្រើប្រាស់ឧស្ម័នបង្ហូរទឹកភ្នែក ដើម្បីព្យាយាមចូលទៅចាប់ខ្លួនបាតុករ ។

ទន្ទឹមនោះ សហជីពកម្មករក៏កំពុងជំរុញឲ្យលោក Macron យកអ្នកសម្របសម្រួលពីខាងក្រៅដើម្បីបញ្ចប់វិបត្តិនេះផងដែរ ខណៈខាងរដ្ឋាភិបាលវិញបាននិយាយថា អាចនឹងពិភាក្សាអំពីគោលនយោបាយនេះ ប៉ុន្តែនឹងមិនផ្លាស់ប្តូរផែនការច្បាប់ដំឡើងអាយុចូលនិវត្តន៍នេះឡើយ ។

ចាប់​តាំង​ពី​ពាក់​កណ្តាល​ខែ​មករា​ ឆ្នាំ២០២៣ មក មាន​ការ​តវ៉ា​ធំៗចំនួន ១០ ថ្ងៃប្រឆាំងនឹងច្បាប់ដំឡើងអាយុចូលនិវត្តន៍ ខណៈគិតត្រឹមថ្ងៃទី២៨ ខែមីនា ឆ្នាំ២០២៣ រដ្ឋាភិបាល​បានដាក់​ពង្រាយ​កម្លាំងមន្ត្រី​​មិនធ្លាប់មានក្នុងប្រវត្តិសាស្ត្រប្រមាណ ១៣,០០០ នាក់ដើម្បី​ទប់ទល់​នឹង​ភាព​ចលាចល​ចុងក្រោយ​បង្អស់មួយនេះ ។

គួរបញ្ជាក់ថា ក្រុមបាតុករចេញពីវិស័យផ្សេងៗដូចជា ដឹកជញ្ជូន អាកាសចរណ៍ និងថាមពលទាំងនៅក្នុងទីក្រុងប៉ារីស និងនៅទូទាំងប្រទេសបារាំង ពាក់ព័ន្ធនឹងច្បាប់ដំឡើងអាយុចូលនិវត្តន៍ពី ៦២ ឡើងដល់ ៦៤ ឆ្នាំរបស់លោក Macron កំពុងធ្វើឲ្យមានការបំផ្លិចបំផ្លាញ ក៏ដូចជារំខានដល់ហេដ្ឋារចនាសម្ព័ន្ធសាធារណៈជាច្រើន ៕

ប្រែសម្រួលដោយ ៖ ជីវ័ន្ត

ប្រភព ៖ SCMP

ចុចអាន ៖ លោក ហ្សេលេនស្គី នឹងលក់ជ័យជម្នះរបស់ អ៊ុយក្រែន ទៅឲ្យលោកខាងលិច