បរិវេណនៃវិមានកាពីតូលក្នុងទីក្រុងវ៉ាស៊ីនតោនឌីស៊ី ត្រូវបានបិទរយៈពេលខ្លីបន្ទាប់ពីមានការព្រមានផ្នែកសន្តិសុខ, ពីរថ្ងៃមុនពេលលោក Joe Biden ស្បថឡើងកាន់តំណែងជាប្រធានាធិបតីសហរដ្ឋអាមេរិក។

ប៉ូលិសនិយាយថា ពួកគេកំពុងមានការប្រុងប្រយ័ត្នខ្ពស់បន្ទាប់ពីសាក្សីរាយការណ៍ថា មានផ្សែងហុយចេញពីកន្លែងនៅក្បែរនោះ។

រឿងនេះបានកើតឡើងចំពេលមានការរៀបចំហាត់សម សម្រាប់ពិធីស្បថឡើងកាន់តំណែងរបស់លោក Biden ។

មនុស្ស៥នាក់បានស្លាប់ បន្ទាប់ពីក្រុមមនុស្សគាំទ្រលោក Trump បានវាយលុកចូលវិមានកាពីតូលកាលពីថ្ងៃទី៦ខែមករា។

កងឆ្មាំជាតិរាប់ពាន់នាក់ត្រូវបានដាក់ពង្រាយនៅកាពីតូល និងនៅកណ្តាលទីក្រុងវ៉ាស៊ីនតោនឌីស៊ី។

ទោះបីជាយ៉ាងណាក៏ដោយ ក្រុមមន្រ្តីបាននិយាយបន្ទាប់ពីការបិទបរិវេណកាលពីថ្ងៃចន្ទថា មិនមានការគំរាមកំហែងដល់សាធារណៈជនទេ។ ឧទ្យាន National Mall នៅជុំវិញបរិវេណនោះ ត្រូវបានបិទរួមជាមួយផ្លូវធំៗជាច្រើន។ របងត្រូវបានដាក់នៅជុំវិញសេតវិមាន។

ការហាត់សមសម្រាប់ពិធីសម្ពោធចូលកាន់តំណែងដែលគ្រោងធ្វើនៅថ្ងៃចន្ទ ត្រូវបានពន្យារពេលម្តងរួចមកហើយដោយសារបញ្ហាសន្តិសុខ។

រដ្ឋទាំង៥០របស់អាមេរិកនិងរដ្ឋធានីវ៉ាស៊ីនតោនឌីស៊ី កំពុងស្ថិតក្នុងការប្រុងជើងការខ្ពស់ចំពោះការតវ៉ាដោយហិង្សាដែលអាចកើតមានឡើង។

FBI បានព្រមានអំពីការដើរក្បួនមានប្រដាប់ដោយអាវុធដោយក្រុមអ្នកគាំទ្រលោក Trump នៅទូទាំងរដ្ឋធានី៕

ប្រែសម្រួលដោយ៖ Vann Vann

ប្រភព៖ BBC

ចុចអាន៖ ការហាត់សមត្រៀមសម្រាប់ពិធីឡើងកាន់តំណែងរបស់លោក Biden ត្រូវពន្យារពេល ព្រោះបញ្ហាសន្តិសុខ