ណាតូ ពង្រីកកម្លាំងយោធានៅអឺរ៉ុបខាងកើត ឡើងដល់ទ្វេដង ចាប់តាំងពីឆ្នាំ២០២១មក

អ្នកនាំពាក្យអង្គការណាតូ លោកស្រី Oana Lungescu បាននិយាយកាលពីដើមសប្តាហ៍នេះថា អង្គការណាតូ បានបង្កើនចំនួនទាហានដែលឈរជើងនៅអឺរ៉ុបខាងកើត ដល់ទៅទ្វេដង ពោលគឺពី ៥០០០នាក់ទៅ ១០០០០នាក់ ចាប់តាំងពីឆ្នាំ២០២១មកម្ល៉េះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ ផែនការរបស់អគ្គលេខាធិការអង្គការណាតូ លោក Jens Stoltenberg ក្នុងការបង្កើនវត្តមានយោធាលើសមុនដល់ទៅ៣០ដង គឺមិនទាន់សម្រេចទេ។

ក្រុមសមរភូមិណាតូថ្មីចំនួនបួន ត្រូវបានបង្កើតឡើង ដើម្បីឆ្លើយតបទៅនឹងប្រតិបត្តិការយោធារបស់រុស្ស៊ីនៅអ៊ុយក្រែន ជាមួយនឹងការដាក់ពង្រាយថ្មីនៅក្នុងប្រទេសប៊ុលហ្គារី ហុងគ្រី រូម៉ានី និងស្លូវ៉ាគី បន្ថែមទៅលើក្រុមសមរភូមិចំនួនបួន ដែលមានស្រាប់នៅអេស្តូនី ឡាតវី លីទុយអានី និងប៉ូឡូញ ដែលសុទ្ធតែជាប្រទេសស្ថិតជាប់ព្រំដែនរុស្ស៊ី។

លោកស្រី Lungescu បានប្រាប់កាសែត Washington Post ថា បច្ចុប្បន្ននេះ មានកងទ័ពចំនួន ១០០០០នាក់ ត្រូវបានបានដាក់ពង្រាយពាសពេញក្រុមសមរភូមិទាំងប្រាំបីនេះ បើប្រៀបធៀបទៅនឹង៥០០០នាក់ ក្នុងក្រុមទាំងបួនក្នុងឆ្នាំ២០២១។

លើសពីនេះ លោក Jens Stoltenberg ចង់ឲ្យកងទ័ព១០០០០នាក់នេះ ទទួលបានគាំទ្រដោយកងទ័ពបម្រុងកម្រិតខ្ពស់ចំនួន៣០ម៉ឺននាក់ទៀត។

គួរបញ្ជាក់ថា អង្គការណាតូ បានចាត់ទុកប្រទេសរុស្ស៊ី ថាជាការគំរាមកំហែងដ៏ធំ និងដោយផ្ទាល់បំផុត ចំពោះសន្តិសុខរបស់សម្ព័ន្ធមិត្ត ព្រមទាំងសន្តិភាពនិងស្ថិរភាពនៅក្នុងតំបន់ អឺរ៉ូ-អាត្លង់ទិក។

យ៉ាងណា ទីក្រុងមូស្គូអះអាងថា ការបន្តពង្រីករបស់ប្លុកនេះ ទៅភាគខាងកើតបន្ទាប់ពីសង្គ្រាមត្រជាក់ និងការទទូចរបស់ខ្លួនលើសមាជិកភាពសម្រាប់អ៊ុយក្រែន គឺជាការគំរាមកំហែងដែលមិនអាចទទួលយកបានចំពោះសន្តិសុខជាតិរបស់រុស្ស៊ី៕

ប្រែសម្រួល៖ Vann Vann

ប្រភព៖ RT

ចុចអាន៖ ណាតូ បញ្ជូនកងទ័ពរាប់រយនាក់ទៀត ទៅកូសូវ៉ូ ក្រោយកើតរឿងចលាចល