ស្ថានភាពខ្យល់ពុលពីភ្លើងឆេះព្រៃ កាណាដា នឹងបន្តវិលវល់នៅ អាមេរិក ជាច្រើនថ្ងៃទៀត

ទីភ្នាក់ងារអាកាសធាតុជាតិរបស់សហរដ្ឋអាមេរិកបានចេញការព្រមានថា លក្ខខណ្ឌខ្យល់មិនល្អ ក៏ដូចជាស្ថានភាពខ្យល់ពុលដែលបណ្តាលមកពីភ្លើងឆេះព្រៃក្នុងប្រទេសកាណាដា នឹងបន្តកើតមាននៅអាមេរិករយៈពេលជាច្រើនថ្ងៃទៀត ។

លោក Bryan Ramsey អ្នកជំនាញផ្នែកឧតុនិយមរបស់ទីភ្នាក់ងារអាកាសធាតុជាតិអាមេរិកបាននិយាយថា “លក្ខខណ្ឌអាកាសធាតុមិនល្អនាពេលបច្ចុប្បន្ននេះ ប្រហែលជានឹងបន្តវិលវល់ក្នុងប្រទេសយ៉ាងហោចណាស់រយៈពេលពីរបីថ្ងៃខាងមុខនេះទៀត” ។

អ្នកជំនាញបានលើកឡើងថា លក្ខខណ្ឌ​មិន​អំណោយផល​ទាំងនេះនឹងលែងកើតមាន ​លុះត្រា​តែ​មាន​ការ​ផ្លាស់​ប្តូរ​ទិសដៅ​ខ្យល់ ​ឬ​ភ្លើង​ឆេះ​ព្រៃ​ត្រូវ​បាន​ពន្លត់ ហើយបើគិតពីទំហំ និងកម្លាំងនៃភ្លើងឆេះព្រៃនេះ គឺកំពុងជះឥទ្ធិពលយ៉ាងធ្ងន់ធ្ងរដល់អាយុជីវិតមនុស្សរាប់លាននាក់នៅក្នុងប្រទេសកាណាដា និងឆ្នេរខាងកើតសហរដ្ឋអាមេរិក ខណៈវាទំនងជាបន្តរយៈពេលជាច្រើនសប្តាហ៍ទៀតផងដែរ ។

ជាការឆ្លើយតបទៅនឹងស្ថានភាពនេះ អភិបាលក្រុងវ៉ាស៊ីនតោនឌីស៊ី លោក Muriel Bowser បានបញ្ជាឲ្យសាលារៀននានាក្នុងទីក្រុង ថែរក្សាសិស្សឲ្យនៅក្នុងផ្ទះ អំឡុងពេលសម្រាក ហើយលុបចោលការធ្វើដំណើរ ក៏ដូចជាសកម្មភាពកីឡានៅទីតាំងបើកចំហរជាដើម ។

គួរបញ្ជាក់ថា បច្ចុប្បន្នមានភ្លើងឆេះព្រៃជាង ៤០០ កន្លែងកំពុងឆាបឆេះពាសពេញផ្នែកផ្សេងៗនៃប្រទេសកាណាដា ដែលបណ្តាលឲ្យមនុស្សប្រហែល ២ ម៉ឺននាក់ត្រូវភៀសខ្លួន ខណៈសហរដ្ឋអាមេរិកឯណោះវិញ បានបញ្ជូនឧបករណ៍ពន្លត់ភ្លើង និងអ្នកពន្លត់អគ្គីភ័យចំនួន ៦០០ នាក់ទៅជួយទប់ស្កាត់ការរីករាលដាននៅប្រទេសកាណាដាផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ១៦ រដ្ឋនៅ អាមេរិក គ្របដណ្តប់ដោយផ្សែងពុលគ្រោះថ្នាក់ ខណៈជើងហោះហើររាប់ពាន់ ត្រូវពន្យារពេល