លោក Stoltenberg បន្តកាន់តំណែងជាប្រមុខអង្គការណាតូ មួយឆ្នាំទៀត

អគ្គលេខាធិការអង្គការណាតូ លោក Jens Stoltenberg បានបញ្ជាក់ថា អាណត្តិរបស់លោក ដែលនឹងត្រូវបញ្ចប់នៅចុងខែកញ្ញាខាងមុខ នឹងត្រូវបន្តរហូតដល់រដូវស្លឹកឈើជ្រុះឆ្នាំក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Stoltenberg បានសរសេរនៅលើ Twitter កាលពីថ្ងៃអង្គារទី៤ខែកក្កដាថា លោកត្រូវបានផ្តល់កិត្តិយសដោយការសម្រេចចិត្តរបស់សម្ព័ន្ធមិត្ត ណាតូ ក្នុងការបន្តអាណត្តិជាអគ្គលេខាធិការរហូតដល់ថ្ងៃទី១ខែតុលាឆ្នាំ២០២៤។ ទន្ទឹមនោះ លោកបានសរសើរតួនាទីរបស់ប្លុកយោធាមួយនេះ ក្នុងការរក្សាសេរីភាព និងសន្តិសុខអស់រយៈពេលជិត៧៥ឆ្នាំ។

លោកបន្ថែមថា “នៅក្នុងពិភពលោកដ៏គ្រោះថ្នាក់ សម្ព័ន្ធរបស់យើងគឺសំខាន់ជាងពេលណាណាទាំងអស់”។

ការបន្តអាណត្តិនេះកើតឡើង ថ្វីបើកាលពីខែកុម្ភៈ អ្នកនាំពាក្យអង្គការណាតូ លោកស្រី Oana Lungescu បានអះអាងថា អាណត្តិរបស់អគ្គលេខាធិការនឹងផុតកំណត់នៅខែតុលាឆ្នាំនេះ ហើយគាត់មិនមានចេតនាស្វែងរកការបន្តអាណត្តិទៀតក៏ដោយ។

គួរបញ្ជាក់ថា លោក Stoltenberg ត្រូវបានតែងតាំងឲ្យដឹកនាំអង្គការណាតូ នៅខែមីនាឆ្នាំ២០១៤ ខណៈអាណត្តិរបស់លោក ត្រូវបានបន្តបីដងរួចមកហើយចាប់តាំងពីពេលនោះមក៕

ប្រែសម្រួល៖ Vann Vann

ប្រភព៖ RT 

ចុចអាន៖ លោក Stoltenberg៖ អាវុធរបស់ណាតូ អស់ពីឃ្លាំងរលីងហើយ