អាល្លឺម៉ង់ បញ្ជូនកងទ័ពរាប់រយនាក់ មកតំបន់ឥណ្ឌូប៉ាស៊ីហ្វិក

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសអាល្លឺម៉ង់ បានបញ្ជូនកងទ័ពទៅកាន់ប្រទេសអូស្ត្រាលី ជាផ្នែកនៃសមយុទ្ធរួមជាមួយនឹងយោធាប្រហែល៣០០០០នាក់ មកពីប្រទេសចំនួន១២ផ្សេងទៀត ដែលនេះគូសបញ្ជាក់អំពីការយកចិត្តទុកដាក់កាន់តែខ្លាំងឡើងរបស់ទីក្រុងបែរឡាំង នៅតំបន់ឥណ្ឌូប៉ាស៊ីហ្វិក ចំពេលមានភាពតានតឹងកើនឡើងជាមួយ ចិន។

ប៉ុន្មានម៉ោងមុនពេលកងទ័ពអាល្លឺម៉ង់ ត្រូវចាកចេញទៅប្រទេសអូស្រ្តាលី, មេទ័ព Alfons Mais បានប្រាប់រ៉យទ័រ ក្នុងបទសម្ភាសមួយ ដែលចេញផ្សាយនៅថ្ងៃចន្ទទី១០ខែកក្កដាថា “វាគឺជាតំបន់ដែលមានសារៈខ្លាំងសម្រាប់យើងនៅក្នុងប្រទេសអាល្លឺម៉ង់ ក៏ដូចជាសម្រាប់សហភាពអឺរ៉ុបផងដែរ ដោយសារតែភាពអាស្រ័យគ្នាផ្នែកសេដ្ឋកិច្ច”។

យោងតាមលោក Mais, ទាហានអាល្លឺម៉ង់រហូតដល់២៤០នាក់ ដែលក្នុងចំណោមនោះក៏មានទាហានឆ័ត្រយោង១៧០នាក់ និងកងម៉ារីន៤០នាក់ផងដែរ នឹងចូលរួមក្នុងសមយុទ្ធ Talisman Saber ចាប់ពីថ្ងៃទី២២ខែកក្កដា ដល់ថ្ងៃទី៤ខែសីហា ខណៈនេះក៏ជាសមយុទ្ធធំបំផុតរវាងអូស្ត្រាលី និងសហរដ្ឋអាមេរិក ដែលធ្វើឡើងរៀងរាល់ពីរឆ្នាំម្តង។

ទន្ទឹមនោះ ទាហានអាល្លឺម៉ង់ ក៏នឹងហ្វឹកហាត់ក្នុងសង្គ្រាមព្រៃ និងប្រតិបត្តិការចុះចត ជាមួយទាហានមកពីប្រទេសដូចជា ឥណ្ឌូណេស៊ី ជប៉ុន កូរ៉េខាងត្បូង បារាំង និងអង់គ្លេសផងដែរ។

គួរបញ្ជាក់ថា ចិន គឺជាដៃគូពាណិជ្ជកម្មសំខាន់បំផុតរបស់ទីក្រុងបែរឡាំង ហើយ៤០%នៃលំហូរពាណិជ្ជកម្មបរទេសរបស់អឺរ៉ុប បានឆ្លងកាត់សមុទ្រចិនខាងត្បូង ដែលជាចំណុចក្តៅនៃជម្លោះក្នុងតំបន់ឥណ្ឌូប៉ាស៊ីហ្វិក៕

ប្រែសម្រួល៖ Vann Vann

ប្រភព៖ CNA

ចុចអាន៖ ឆ្នាំក្រោយ អាល្លឺម៉ង់ បញ្ជូននាវាចម្បាំង មកតំបន់ឥណ្ឌូប៉ាស៊ីហ្វិក