ចិន រងការវាយប្រហារ ដោយភ្លៀងធ្លាក់ ធ្ងន់ធ្ងរបំផុតមិនធ្លាប់មាន ក្នុងរយៈពេល ១៤០ឆ្នាំ

ភ្លៀងដែលវាយលុកទីក្រុងប៉េកាំង ក្នុងរយៈពេលប៉ុន្មានថ្ងៃថ្មីៗនេះ គឺជាកម្រិតភ្លៀងធ្លាក់ធ្ងន់ធ្ងរបំផុត ចាប់តាំងពីកំណត់ត្រាបានចាប់ផ្តើមកាលពី១៤០ឆ្នាំមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារឧតុនិយមក្រុងប៉េកាំង, បរិមាណទឹកភ្លៀងអតិបរមាដែលកត់ត្រាក្នុងអំឡុងពេលព្យុះ Doksuri គឺ៧៤៤.៨ មិល្លីម៉ែត្រ។

ព្យុះ Doksuri បានបោកបក់ឆ្ពោះទៅភាគខាងជើងប្រទេសចិន បន្ទាប់ពីវាយប្រហារខេត្ត Fujian ភាគខាងត្បូង កាលពីសប្តាហ៍មុន ក្រោយបង្កមហន្តរាយនៅហ្វីលីពីន ខណៈភ្លៀងធ្លាក់ខ្លាំង បានចាប់ផ្តើមវាយលុករដ្ឋធានី និងតំបន់ជុំវិញតាំងពីថ្ងៃសៅរ៍មក។

កាលពីថ្ងៃអង្គារ ទូរទស្សន៍រដ្ឋ CCTV បានផ្សាយថា ភ្លៀងបានសម្លាប់មនុស្សយ៉ាងតិច១១នាក់នៅទីក្រុងប៉េកាំង ដោយក្នុងនោះមាន២នាក់ជាបុគ្គលិកសង្គ្រោះ ដែលត្រូវបាត់បង់ជីវិតពេលកំពុងបំពេញភារកិច្ច។

នៅខេត្ត Hebei មនុស្សជាង ៨០ ម៉ឺននាក់ត្រូវបានជម្លៀស ខណៈ ៩ នាក់បានស្លាប់ និង ៦ នាក់ទៀតបាត់ខ្លួន ។ ចំណែកជនរងគ្រោះ ២ នាក់ផ្សេងទៀតត្រូវបានរាយការណ៍នៅក្នុងខេត្ត Liaoning ខណៈមនុស្ស​ ១៣ ​នាក់​នៅ​តែបាត់​ខ្លួន ប៉ុន្តែ​ ១៤​ នាក់​ទៀត ​ត្រូវ​បាន​រក​ឃើញ​ដោយ​សុវត្ថិភាព ។

គួរបញ្ជាក់ថា ប្រទេស​ចិន​បាន​និង​កំពុង​ជួប​ប្រទះ​អាកាសធាតុកាចសាហាវ ដែលក្រុម​អ្នក​វិទ្យាសាស្ត្រ​និយាយ​ថា ​កំពុង​មាន​ឥទ្ធិពលកាន់តែ​ខ្លាំង​ឡើងៗ ​ដោយសារបម្រែបម្រួល​អាកាសធាតុ ហើយឥឡូវនេះ ចិនក៏កំពុងប្រុងជើងការសាជាថ្មីផងដែរ ចំពោះការមកដល់នៃព្យុះទីហ្វុង Khanun ដែលជាព្យុះទីប្រាំមួយក្នុងឆ្នាំនេះ៕

ប្រែសម្រួល៖ Vann Vann

ប្រភព៖ CNA

ចុចអាន៖ ទីក្រុងប៉េកាំង ត្រូវរងគ្រោះ ដោយសារព្យុះ Doksuri វាយសន្ធាប់