អាល្លឺម៉ង់ ជម្លៀសមនុស្សជាង ១ម៉ឺននាក់ ក្រោយរកឃើញ គ្រាប់បែកសម័យសង្គ្រាមលោកលើកទីពីរ

ក្រុមអ្នកពន្លត់អគ្គិភ័យបាននិយាយកាលពីថ្ងៃអង្គារ ទី៨ ខែសីហាថា មនុស្សប្រហែល ១៣,០០០ នាកត្រូវបានជម្លៀសចេញពីផ្ទះរបស់ពួកគេជាបណ្តោះអាសន្ននៅក្នុងទីក្រុង Duesseldorf ភាគខាងលិចប្រទេសអាល្លឺម៉ង់ បន្ទាប់ពីការរកឃើញគ្រាប់បែកអាមេរិកសម័យសង្គ្រាមលោកលើកទីពីរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កងពន្លត់អគ្គិភ័យនិយាយថា គ្រាប់បែកទម្ងន់មួយតោន ដែលផលិតដោយសហរដ្ឋអាមេរិក នឹងត្រូវបំផ្ទុះនៅពេលយប់ បន្ទាប់ពីវាត្រូវបានរកឃើញក្នុងអំឡុងពេលធ្វើការ នៅក្នុងតំបន់ក្បែរសួនសត្វក្រុង ។

គួរបញ្ជាក់ថា ផ្ទៃដីនៅក្នុងទីក្រុងនានារបស់អាល្លឺម៉ង់ នៅតែពោរពេញដោយគ្រាប់មិនទាន់ផ្ទុះ ដែលត្រូវបានរកឃើញជាទៀងទាត់នៅតាមការដ្ឋានសំណង់ ពោល ៧៨ ឆ្នាំ បន្ទាប់ពីសង្គ្រាមលោកលើកទីពីរ ។

នៅឆ្នាំ ២០១៧ ការរកឃើញគ្រាប់បែកទម្ងន់ ១.៤ តោនក្នុងទីក្រុង Frankfurt បានបង្ខំឲ្យមានការជម្លៀសមនុស្ស ៦៥,០០០ នាក់ ហើយនៅខែធ្នូ ឆ្នាំ ២០២១ គ្រាប់បែកសម័យសង្គ្រាមលោកលើកទី២ បានផ្ទុះនៅការដ្ឋានសំណង់ក្បែរស្ថានីយ៍ទីក្រុង Munich ដោយបណ្តាលឲ្យមនុស្សចំនួន ៤ នាក់រងរបួស និងរំខានដល់ចរាចរណ៍ផ្លូវដែកទៀតផង ៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ ទ័ពជើងទឹកអង់គ្លេសបំផ្ទុះគ្រាប់មីនសម័យសង្គ្រាមលោកលើកទី ២ (មានវីដេអូ)