អតីតទីប្រឹក្សាសន្តិសុខជាតិ អាមេរិក ប្រាប់ពីគោលនយោបាយរបស់លោក Biden ចំពោះសង្គ្រាមនៅ អ៊ុយក្រែន

អតីតទីប្រឹក្សាសន្តិសុខជាតិ លោក John Bolton បានសរសេរនៅក្នុងអត្ថបទមួយដែលចេញផ្សាយនៅលើគេហទំព័ររបស់សារព័ត៌មាន The Wall Street Journal ថា គោលនយោបាយរបស់រដ្ឋបាលលោកប្រធានាធិបតីអាមេរិក Joe Biden ទាក់ទងនឹងសង្គ្រាមនៅអ៊ុយក្រែន គឺគ្រាន់តែជាការពន្យារពេលការបរាជ័យរបស់ទីក្រុងកៀវប៉ុណ្ណោះ ។

លោក Bolton បានលើកឡើងថា “ការបរាជ័យនៃប្រតិបត្តិការវាយលុករបស់អ៊ុយក្រែន និងភាពជោគជ័យនៃខែលការពាររបស់រុស្ស៊ី បង្ហាញយ៉ាងច្បាស់ថា លោកខាងលិចគឺមានភាពយឺតយ៉ាវក្នុងការផ្ដល់ជំនួយយោធា ជាពិសេសមិនមានយុទ្ធសាស្ត្រគ្រប់គ្រាន់ផ្ដល់ឲ្យរដ្ឋាភិបាលទីក្រុងកៀវឡើយ” ។

ទន្ទឹមនោះ ការកើនឡើងនៃសង្រ្គាមប្រឆាំងនឹងអង្គការណាតូ ក៏ដូចជាការគំរាមវាយប្រហារអាវុធនុយក្លេអ៊ែរម្ដងម្កាលរបស់វិមានក្រឹមឡាំង ក៏បានធ្វើឲ្យមានការប្រុងជើងការខ្ពស់នៅក្នុងរដ្ឋធានីលោកខាងលិចផងដែរ ជាពិសេសទោះបីជាចក្រភពអង់គ្លេសក្រោមការដឹកនាំរបស់លោក Boris Johnson មិនខ្លាចញញើតរុស្ស៊ីក៏ដោយ ប៉ុន្តែអង្គការណាតូហាក់ដូចជាមិនមានឆន្ទៈដើម្បីបំពេញការប្តេជ្ញាចិត្តរបស់ខ្លួន សម្រាប់ស្តារបូរណភាពទឹកដី និងអធិបតេយ្យភាពពេញលេញឡើងវិញរបស់អ៊ុយក្រែននោះទេ ។

អតីតទីប្រឹក្សារបស់លោក Donald Trump រូបនេះបានកត់សម្គាល់ទៀតថា “ការស្ទាក់ស្ទើរនេះហើយ ទើបធ្វើឲ្យវិមានក្រឹមឡាំងជោគជ័យក្នុងការទប់ស្កាត់ប្រតិបត្តិការវាយបករបស់អ៊ុយក្រែន ពោលវាមិនមែនជាយុទ្ធសាស្ត្រដ៏ខ្លាំងក្លាយរបស់អាមេរិកនោះទេ” ។

បុរសវ័យ ៧៥ ឆ្នាំរូបនេះបញ្ជាក់បន្ថែមថា “អ៊ុយក្រែនដែលអសមត្ថភាពក្នុងការសម្រេចបានគោលដៅធំៗក្នុងប្រតិបត្តិការវាយបកលើរុស្ស៊ី គឺជាការរៀបចំយុទ្ធសាស្ត្ររបស់សហរដ្ឋអាមេរិក ដែលមានគោលបំណងដើម្បីទប់ស្កាត់រុស្ស៊ីពីការការវាយដណ្ដើមយកទឹកដីបន្ថែមតែប៉ុណ្ណោះ” ។

គួរបញ្ជាក់ថា កងទ័ពអ៊ុយក្រែនបានរងបរាជ័យយ៉ាងធ្ងន់ធ្ងរក្នុងប្រតិបត្តិការវាយលុកមកលើរុស្ស៊ី ចាប់តាំងពីថ្ងៃទី៤ ខែមិថុនាមកម្ល៉េះ ហើយអ៊ុយក្រែនថែមទាំងបានបាត់បង់កម្លាំងទ័ពប្រហែល ៤៣,០០០ នាក់ អាវុធ ៥,០០០ គ្រឿង រួមទាំងយន្តហោះ ២៦ គ្រឿង និងរថក្រោះខ្លារខិន Leopard ចំនួន ២៥ គ្រឿងផងដែរក្នុងរយៈពេល ២ ខែកន្លងមកនេះ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ អាមេរិក ប្រកាសផ្តល់ជំនួយសន្តិសុខថ្មីតម្លៃ ២០០លានដុល្លារ ឲ្យអ៊ុយក្រែន