លោក បៃដិន នឹងពិភាក្សាបញ្ហាសំខាន់ចំនួន៣ នៅ វៀតណាម

ប្រធានាធិបតីសហរដ្ឋអាមេរិក លោក ចូ បៃដិន នឹងធ្វើដំណើរទស្សនកិច្ច ទៅកាន់រដ្ឋធានីហាណូយ របស់វៀតណាម ខណៈរដ្ឋាភិបាលរបស់លោក កំពុងជំរុញឲ្យបង្កើនទំនាក់ទំនងការទូតជាផ្លូវការជាមួយប្រទេសដែលជាចំណុចស្នូលសម្រាប់ការប្រកួតប្រជែង រវាងចិននិងអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានបក្សកុម្មុយនិស្តវៀតណាម លោក Nguyen Phu Trong ព្រមទាំងមេដឹកនាំផ្សេងទៀត នឹងធ្វើជាម្ចាស់ផ្ទះទទួលលោក បៃដិន សម្រាប់កិច្ចពិភាក្សាលើបញ្ហាសំខាន់ចំនួន៣ ដូចជាសេដ្ឋកិច្ច បច្ចេកវិទ្យា និងអាកាសធាតុ។

មកទល់ពេលនេះ មានយន្តហោះចំនួន៥គ្រឿងហើយ ដែលបានដឹកសម្ភារនិងគ្រឿងបរិក្ខារសម្រាប់ដំណើរទស្សនកិច្ចរបស់លោកបៃដិន ទៅដល់ប្រទេសវៀតណាម។

កាលពីថ្ងៃទីសុក្រទី១ខែកញ្ញា យន្តហោះ Boeing C-17 Globemaster ចំនួន៣គ្រឿងដែលដឹករថយន្តប្រធានាធិបតីអាមេរិក និងឧបករណ៍ផ្សេងទៀត បានទៅដល់ទីក្រុងហាណូយ ហើយយន្តហោះ C-17 ទី៤និងទី៥ បានទៅដល់អាកាសយានដ្ឋាន Noi Bai ក្នុងទីក្រុងហាណូយ កាលពីថ្ងៃអាទិត្យ។

គួរបញ្ជាក់ថា ដំណើរទស្សនកិច្ចនេះ នឹងក្លាយជាដំណើរលើកដំបូងរបស់លោក បៃដិន ទៅកាន់ប្រជាជាតិអាស៊ីអាគ្នេយ៍មួយនេះ ចាប់តាំងពីលោកចូលកាន់តំណែងកាលពីដើមឆ្នាំ២០២១ ហើយនឹងកើតឡើងចំពេលប្រទេសទាំងពីរ ប្រារព្ធខួប១០ឆ្នាំនៃភាពជាដៃគូគ្រប់ជ្រុងជ្រោយនៅឆ្នាំនេះ។

ព្រឹត្តិការណ៍​នេះ​ ក៏​នឹងក្លាយ​ជា​លើក​ដំបូងដែរ ​ដែល​ប្រធានាធិបតី​អាមេរិកមួយរូប ទៅ​បំពេញ​ទស្សនកិច្ចទីក្រុងហាណូយ ​តាម​ការ​អញ្ជើញ​របស់​អគ្គលេខាធិការ​បក្ស​កុម្មុយនិស្ត​វៀតណាម។

វៀតណាម​និង​អាមេរិក ​បាន​បង្កើត​ទំនាក់ទំនង​ការទូត​ក្នុង​ខែវិច្ឆិកាឆ្នាំ​១៩៩៥ ហើយ​បាន​លើក​កម្ពស់ទំនាក់ទំនង​ទៅជា​ដៃគូ​គ្រប់​ជ្រុងជ្រោយ​ក្នុង​ខែកក្កដា ឆ្នាំ​២០១៣៕

ប្រែសម្រួល៖ Vann Vann

ប្រភព៖ VN Express, Tuoi Tre, Asia.Nikkei

ចុចអាន៖ ខែក្រោយ លោក ចូ បៃដិន នឹងបំពេញទស្សនកិច្ចនៅ វៀតណាម