អ៊ីស្រាអែល ថាឲ្យ បូលីវី ដល់ៗ ក្រោយកាត់ផ្តាច់ចំណងទាក់ទង

ក្រសួងការបរទេសអ៊ីស្រាអែល បានស្តីបន្ទោសចំៗថា ប្រទេសបូលីវី កំពុងចូលដៃជើងជាមួយក្រុមហាម៉ាស់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យ Lior Haiat បាននិយាយក្នុងសារបង្ហោះលើគេហទំព័រ X ថា “ការសម្រេចចិត្តរបស់បូលីវី កាត់ទំនាក់ទំនងការទូតជាមួយអ៊ីស្រាអែល គឺជាការចុះចាញ់អំពើភេរវកម្ម និងចុះចាញ់របប Ayatollah ក្នុងប្រទេសអ៊ីរ៉ង់”។

នេះគឺជាការឆ្លើយតប បន្ទាប់ពីបូលីវី កាត់ផ្តាច់ទំនាក់ទំនងការទូតជាមួយអ៊ីស្រាអែល ជុំវិញអ្វីដែលខ្លួននិយាយថា ជាការវាយលុកយ៉ាងគឃ្លើន និងមិនសមាមាត្ររបស់យោធាអ៊ីស្រាអែល នៅក្នុងតំបន់ហ្គាហ្សា។

ទន្ទឹមនោះ រដ្ឋមន្ត្រីការបរទេសស្តីទីលោកស្រី Maria Nela Prada បានចោទប្រកាន់អ៊ីស្រាអែលថា “ប្រព្រឹត្តឧក្រិដ្ឋកម្មមនុស្សជាតិ” ប្រឆាំងនឹងប៉ាឡេស្ទីននៅតំបន់ហ្គាហ្សាទៀតផង ហើយអំពាវនាវឲ្យរដ្ឋាភិបាលអ៊ីស្រាអែល បញ្ឈប់ការវាយប្រហារនៅតំបន់ហ្គាហ្សា ដែលបណ្តាលឲ្យជនស៊ីវិលរាប់ពាន់នាក់បាត់បង់ជីវិត និងការជម្លៀសប្រជាជនប៉ាឡេស្ទីនដោយបង្ខំ។

គួរបញ្ជាក់ថា ក្រៅពីបូលីវី ប្រទេសជិតខាងគឺកូឡុំប៊ីនិងឈីលី ក៏បានកោះហៅឯកអគ្គរដ្ឋទូតរបស់ពួកគេ មកពិគ្រោះយោបល់ ដើម្បីចេញសេចក្តីថ្លែងការណ៍ថ្កោលទោសការស្លាប់របស់ជនស៊ីវិលនៅតំបន់ហ្គាហ្សា និងអំពាវនាវឲ្យមានបទឈប់បាញ់ផងដែរ៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ ប្រទេសមួយនៅអាមេរិកខាងត្បូង កាត់ផ្តាច់ទំនាក់ទំនងការទូត ជាមួយ អ៊ីស្រាអែល