ព័ត៌មានអន្ដរជាតិ

ច្បាស់ការណ៍ពីថ្ងៃដែលលោក ស៊ី ជីនពីង ជួបពិភាក្សាជាមួយលោក បៃដិន នៅទឹកដី អាមេរិក

បានផុស

២ years មុន

នៅ

ថ្ងៃសៅរ៍ ១១ វិច្ឆិកា ២០២៣

ដោយ

មន្ត្រីជាន់ខ្ពស់អាមេរិកមួយរូបកាលពីថ្ងៃសុក្របានបង្ហើបព័ត៌មានថា ប្រធានាធិបតីសហរដ្ឋអាមេរិកលោក ចូ បៃដិន និងប្រធានាធិបតីចិនលោក ស៊ី ជីនពីង នឹងជួបពិភាក្សាគ្នានៅខាងក្រៅកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកនៅទីក្រុង San Francisco នាថ្ងៃពុធ ទី១៥ ខែវិច្ឆិកានេះ ។

ទន្ទឹមនោះ កិច្ចប្រជុំនេះក៏នឹងក្លាយជាការជួបតទល់គ្នាលើកដំបូងរបស់មេដឹកនាំមហាអំណាចទាំងពីរក្នុងរយៈពេល ១ ឆ្នាំ ខណៈលោក ស៊ី និងលោក បៃដិន ធ្លាប់បានពិភាក្សាគ្នារួចមកហើយផងដែរកាលពីខែវិច្ឆិកាឆ្នាំមុន នៅពេលដែលមេដឹកនាំទាំងពីរបានចូលរួមកិច្ចប្រជុំក្រុមប្រទេស G20 នៅប្រទេសឥណ្ឌូណេស៊ី ។

មន្ត្រីរូបនេះនិយាយថា លោក បៃដិន និងលោក ស៊ី នឹងជួបពិភាក្សាគ្នាអំពីទិសដៅយុទ្ធសាស្ត្រក្នុងទំនាក់ទំនងអាមេរិក-ចិន ក៏ដូចជាសារៈសំខាន់នៃការរក្សាកិច្ចសន្ទនាពាក់ព័ន្ធទៅនឹងមន្ត្រីយោធារបស់ប្រទេសទាំងពីរ ខណៈមេដឹកនាំទាំងពីរក៏នឹងពិភាក្សាអំពីបញ្ហាប្រឈមជាសកលផងដែរ ដូចជា សង្គ្រាមលុកលុយរបស់រុស្ស៊ីលើអ៊ុយក្រែន រួមជាមួយជម្លោះរវាងអ៊ីស្រាអែល និងក្រុមហាម៉ាស ក៏ដូចជាបញ្ហាក្នុងតំបន់ជាដើម ។

ដោយឡែកពាក់ព័ន្ធនឹងប្រធានបទផ្សេងទៀតក្នុងជំនួបរវាងលោក បៃដិន និងលោក ស៊ី ដែលនឹងលើកយកមកពិភាក្សា រួមមានសិទ្ធិមនុស្សនៅក្នុងប្រទេសចិន តៃវ៉ាន់ និងសមុទ្រចិនខាងត្បូង ដែលប្រទេសចិនកំពុងបង្កើនសកម្មភាពដែនសមុទ្ររបស់ខ្លួន ។

គួរបញ្ជាក់ថា ប្រទេសទាំងពីរបាននិងកំពុងស្វះស្វែងរៀបចំកិច្ចប្រជុំនេះ ខណៈកាលពីចុងខែតុលា អ្នកការទូតកំពូលរបស់ចិនលោក Wang Yi ក៏បានធ្វើទស្សនកិច្ចមកកាន់ទីក្រុងវ៉ាស៊ីនតោនផងដែរ ដើម្បីត្រួសត្រាយផ្លូវសម្រាប់កិច្ចប្រជុំកំពូលមួយនេះ ជាពិសេសក្នុងគោលបំណងគ្រប់គ្រងការប្រកួតប្រជែងរវាងប្រទេសទាំងពីរ ក៏ដូចជាដើម្បីបញ្ចៀសហានិភ័យនៃការខិតជិតទៅរកជម្លោះណាមួយ ៕

ប្រែសម្រួលដោយ ៖ ជីវ័ន្ត

ប្រភព ៖ NHK