ក្រុមហ៊ុនអាកាសចរណ៍ ចិន ជាច្រើន ផ្អាកជើងហោះហើរមកកាន់ ថៃ ព្រោះ​មានអ្នកជិះតិចពេក

ក្រុមហ៊ុនអាកាសចរណ៍ចិនជាច្រើនបានផ្អាកជើង​ហោះហើរមកកាន់ប្រទេសថៃ ដោយសារតែចំនួនអ្នកជិះកាន់តែមានការថយចុះ ទោះបីជាមានគោលនយោបាយលើកលែងទិដ្ឋការពីសំណាក់ប្រទេសថៃក៏ដោយ ។

ក្រុមហ៊ុនអាកាសចរណ៍ចិនជាច្រើន ធ្លាប់បានស្នើសុំទីតាំងចុះចតដើម្បីដំណើរការជើងហោះហើរទៅកាន់ប្រទេសថៃ និងបានកក់សេវាកម្មគ្រប់គ្រងចំណតសម្រាប់យន្តហោះរបស់ពួកគេ ប៉ុន្តែទោះយ៉ាងណាក៏ដោយ ក្រុមហ៊ុនអាកាសចរណ៍ទាំងនោះ បានសម្រេចចិត្តបោះបង់សិទ្ធិចុះចត​ និងហោះហើរទៅវិញ ដោយសារតែ​ចំនួនអ្នកជិះ​មិនគ្រប់គ្រាន់ទៅតាមលក្ខខណ្ឌនៃការហោះហើរបានឡើយ ។

ទាក់ទង​នឹងការផ្អាកនេះដែរ នាយករដ្ឋមន្ត្រីថៃលោក សេដ្ឋា ថាវីស៊ីន លើកឡើងថា គឺដោយសារតែ​សេដ្ឋកិច្ច​ក្នុងប្រទេសចិនមិនសូវជាអំណោយផល ទន្ទឹមនឹងគោលនយោបាយជំរុញទេសចរក្នុងស្រុកពីសំណាក់រដ្ឋាភិបាលចិនផង​ ទើបធ្វើឲ្យចំនួនទេសចរហោះមកលេងថៃ​ខុសពីការរំពឹងទុកបែបនេះ ។

បើយោងតាមអជ្ញាធរទេសចរណ៍ថៃ (TAT) បានឲ្យដឹងថា ក្នុងអំឡុងវិស្សមកាលមាស មានទេសចរជនជាតិចិនចន្លោះពី ១៧,០០០ ទៅ ១៨,០០០ នាក់ចូលមកកាន់ថៃ ។ ប៉ុន្តែចំនួនបានធ្លាក់ចុះ​មកនៅត្រឹមជាង ១ ម៉ឺននាក់ប៉ុណ្ណោះ បន្ទាប់ពី​វិស្សមកាលមាស​ក្នុងប្រទេសចិនបានបញ្ចប់ ។

គួរបញ្ជាក់ថា ថៃដាក់គោលដៅ​លើទេសចរចិនចំនួន ៤.៤ លាននាក់ក្នុងឆ្នាំនេះ ខណៈ​ត្រឹមរយៈពេល ១១ ខែកន្លងមកនេះ ថៃ​ស្វាគមន៍ទេសចរចិន​បានត្រឹមតែជាង ២.៩ លាននាក់ប៉ុណ្ណោះ ៕

ប្រែសម្រួល៖ នាង រតនៈ

ប្រភព៖ Bangkok Post