ទីក្រុងមូស្គូ៖ អាមេរិក ព្យាយាមរៀបចំរដ្ឋប្រហារនៅ រុស្ស៊ី

អនុរដ្ឋមន្ត្រីការបរទេសរុស្ស៊ី លោក Sergey Ryabkov អះអាងថា សហរដ្ឋអាមេរិក កំពុងផ្តោតការយកចិត្តទុកដាក់កាន់តែខ្លាំងឡើង លើការបង្កភាពចលាចលនៅក្នុងប្រទេសរុស្ស៊ី និងមានបំណងដកតំណែងមេដឹកនាំរបស់ប្រទេសនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន TASS បានដកស្រង់សម្តីលោក Ryabkov ដែលនិយាយកាលពីថ្ងៃអង្គារទី២៨ខែវិច្ឆិកាថា ការប្រឈមមុខដាក់គ្នារវាងទីក្រុងមូស្គូនិងវ៉ាស៊ីនតោន បានក្លាយជាការពិតដែលត្រូវតែទទួលស្គាល់។

អនុរដ្ឋមន្ត្រីរូបនេះបន្តថា “សហរដ្ឋអាមេរិក មិនត្រឹមតែធ្វើសង្រ្គាមកូនកាត់លើប្រទេសរុស្ស៊ីប៉ុណ្ណោះទេ ប៉ុន្តែថែមទាំងបង្ហាញពីការយកចិត្តទុកដាក់កាន់តែខ្លាំងឡើង លើការផ្លាស់ប្តូរការដឹកនាំនៅទីនេះ និងរៀបចំរដ្ឋប្រហារផ្ទៃក្នុងរុស្ស៊ីទៀតផង”។

អ្នកនយោបាយលោកខាងលិច និងប្រព័ន្ធផ្សព្វផ្សាយនានា បានអបអរសាទរដោយបើកចំហនូវអ្វីដែលពួកគេមើលឃើញ ថាជាការគំរាមកំហែងដល់ការគ្រប់គ្រងរបស់ប្រធានាធិបតីវ្ល៉ាឌីមៀរ ពូទីន ពេលដែលក្រុមយោធាឯកជន Wagner ចាប់ផ្តើមការប៉ុនប៉ងបះបោរកាលពីរដូវក្តៅមុន។

ថ្វីបើទីក្រុងវ៉ាស៊ីនតោន បដិសេធការជាប់ពាក់ព័ន្ធណាមួយនៅក្នុងព្រឹត្តិការណ៍ទាំងនោះក៏ដោយ ប៉ុន្តែរបាយការណ៍ជាបន្តបន្ទាប់អះអាងថា ភ្នាក់ងារចារកម្មលោកខាងលិច បានដឹងអំពីការបះបោរនោះ។

ភាពតានតឹងរវាងសហរដ្ឋអាមេរិកនិងរុស្ស៊ី បានកើនឡើងយ៉ាងខ្លាំងនៅពេលទីក្រុងមូស្គូ ចាប់ផ្តើមប្រតិបត្តិការយោធារបស់ខ្លួននៅប្រទេសអ៊ុយក្រែនក្នុងខែកុម្ភៈ ឆ្នាំ២០២២។

ក្រោយមក ទីក្រុងវ៉ាស៊ីនតោនបានដាក់ទណ្ឌកម្មទ្រង់ទ្រាយធំលើទីក្រុងមូស្គូ និងបានផ្តល់ជំនួយយោធាគិតជាទឹកប្រាក់ រាប់សិបពាន់លានដុល្លារដល់ទីក្រុងកៀវ៕

ប្រែសម្រួល៖ Vann Vann

ប្រភព៖ RT

ចុចអាន៖ ស្ងាត់ៗ រុស្ស៊ី បើកការវាយលុកលើកទី ៣ ទៅលើតំបន់ភាគខាងកើត អ៊ុយក្រែន