UN ថា ឥឡូវនេះ មីយ៉ាន់ម៉ា ក្លាយជាប្រភពអាភៀនធំជាងគេបំផុតលើលោក

យោងតាមរបាយការណ៍របស់អង្គការសហប្រជាជាតិ (UN) បានបង្ហាញកាលពីថ្ងៃអង្គារថា ប្រទេសមីយ៉ាន់ម៉ាបានក្លាយជាប្រភពនៃអាភៀនដ៏ធំបំផុតរបស់ពិភពលោក ដោយសារតែបញ្ហាអស្ថិរភាពក្នុងតំបន់ និងការធ្លាក់ចុះនៃការដាំដុះនៅក្នុងប្រទេសអាហ្វហ្គានីស្ថាន ។

ការដាំដុះអាភៀននៅក្នុងប្រទេសអាហ្វហ្គានីស្ថានបានធ្លាក់ចុះ​ជាង ៩៥ ភាគរយ បន្ទាប់ពី​ក្រុមតាលីបង់ឡើងគ្រប់គ្រងនៅឆ្នាំ ២០២២ និងដាក់ចេញការហាមឃាត់លើគ្រឿងញៀន ខណៈមីយ៉ាន់ម៉ាដែលកំពុងមានអស្ថេរភាពនយោបាយ សង្គម និងសេដ្ឋកិច្ច បានជំរុញមនុស្សជាច្រើនទៅធ្វើកសិកម្មអាភៀន ។

បើ​តាម​របាយការណ៍​ស្តីពី​គ្រឿងញៀន និង​ឧក្រិដ្ឋកម្មរបស់អង្គការសហប្រជាជាតិ (UNODC) បានឲ្យដឹងថា ផ្ទៃ​ដីដាំដុះអាភៀនរបស់មីយ៉ាន់ម៉ា បានកើនឡើងពី ៤០,១០០ ហិកតាដល់ទំហំ ៤៧,០០០ ហិកតា ។ កសិករមីយ៉ាន់ម៉ាបច្ចុប្បន្ន រកបានប្រហែល ៧៥ ភាគរយពីការធ្វើកសិកម្មអាភៀន ខណៈដែលតម្លៃជាមធ្យមនៃផ្កាអាភៀនកើនឡើងដល់ ៣៥៥ ដុល្លារក្នុងមួយគីឡូក្រាម ។

ពាក់ព័ន្ធនឹងបញ្ហានេះដែរ អ្នកតំណាងប្រចាំតំបន់របស់ UNODC លោក Jeremy Douglas បាននិយាយថា ការរំខានផ្នែកសេដ្ឋកិច្ច សន្តិសុខ និងអភិបាលកិច្ច បន្ទាប់ពីយោធាមីយ៉ាន់ម៉ាឡើងកាន់កាប់អំណាច ជាកត្តាជំរុញកសិករនៅតំបន់ដាច់ស្រយាលឆ្ពោះទៅរកការដាំអាភៀនដើម្បីចិញ្ចឹមជីវិត ។

លោកបញ្ជាក់ទៀតថា តំបន់ដាំដុះអាភៀនបានពង្រីកភាគច្រើននៅក្នុងតំបន់ព្រំដែនមីយ៉ាន់ម៉ានៅភាគខាងជើងរដ្ឋ Shan បន្ទាប់មករដ្ឋ Chin និងរដ្ឋ Kachin ខណៈដែលទិន្នផលកើនឡើងពី ១៦ ទៅដល់ ២៣ គីឡូក្រាមក្នុងមួយហិកតា ដោយសារតែការអនុវត្តកសិកម្មកាន់តែទំនើប ៕​

ប្រែសម្រួល៖ នាង រតនៈ

ប្រភព​៖ CNA