ក្រុមហាម៉ាស ថា ២៤ម៉ោងចុងក្រោយ អ៊ីស្រាអែល សម្លាប់មនុស្សនៅហ្គាហ្សា ២៤១នាក់ 

ក្រសួងសុខាភិបាលដែលគ្រប់គ្រងដោយក្រុមហាម៉ាសនៅតំបន់ហ្គាហ្សានិយាយថា ត្រឹម២៤ម៉ោងចុងក្រោយ មនុស្សចំនួន២៤១នាក់ ត្រូវសម្លាប់តាមទីតាំងជាច្រើន ខណៈប្រតិបត្តិការយោធារបស់អ៊ីស្រាអែលក្នុងទឹកដីនេះ នៅតែបន្តដោយឥតមានសញ្ញាថមថយសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះ អ៊ីស្រាអែលនិយាយថា ខ្លួនបានវាយលុកទីតាំងជាង១០០កាលពីថ្ងៃអង្គារ ចំពេលមានរបាយការណ៍អំពីប្រតិបត្តិការជើងគោក នៅកណ្តាលតំបន់ហ្គាហ្សា។

ចំណែកនៅតំបន់ West Bank, មានជនជាតិប៉ាឡេស្ទីន៦នាក់ ត្រូវបានសម្លាប់ក្នុងការវាយប្រហារដោយយន្តហោះគ្មានមនុស្សបើករបស់អ៊ីស្រាអែលនៅពេលយប់ ក្នុងជំរំជនភៀសខ្លួន Nur Shams នៃទីក្រុង Tulkarem។

លើសពីនេះ ក្រសួងសុខាភិបាលរបស់ហ្គាហ្សាក៏បញ្ជាក់ដែរថា មនុស្សចំនួន៣៨២នាក់ រងរបួសក្នុងរយៈពេល២៤ម៉ោងដូចគ្នា។

យោងតាមក្រសួង ក្នុងការប្រយុទ្ធគ្នារយៈពេលជាង១១សប្តាហ៍, មានជនជាតិប៉ាឡេស្ទីន២០៩១៥នាក់ ត្រូវបានសម្លាប់ ភាគច្រើនជាកុមារ និងស្ត្រី។

សូមបញ្ជាក់ជាថ្មី សង្រ្គាមបានចាប់ផ្តើមនៅថ្ងៃទី៧ខែតុលា បន្ទាប់ពីក្រុមហាម៉ាស បើកការវាយប្រហារទៅលើសហគមន៍នានាក្នុងប្រទេសអ៊ីស្រាអែល។ មនុស្សប្រហែល១២០០នាក់ ដែលភាគច្រើនជាជនស៊ីវិលត្រូវបានសម្លាប់នៅពេលនោះ។

មិនត្រឹមប៉ុណ្ណឹង ក្រុមហាម៉ាស ថែមទាំងចាប់មនុស្សប្រហែល២៤០នាក់ទៅ ហ្គាហ្សា ធ្វើជាចំណាប់ខ្មាំងផងដែរ ប៉ុន្តែក្រោយមក ពួកគេមួយចំនួនត្រូវបានដោះលែងវិញ៕

ប្រែសម្រួល៖ Vann Vann

ប្រភព៖ BBC

ចុចអាន៖ មេដឹកនាំក្រុមហាម៉ាសមិនព្រមលើកទង់ ស សុំចុះចាញ់ អ៊ីស្រាអែល ដាច់ខាត