ព័ត៌មានអន្ដរជាតិ

ទីក្រុងហាណូយ អនុវត្តដំណោះស្រាយកាត់បន្ថយខ្យល់ពុល រួមទាំងបង្ការការដុតគល់ជញ្រ្ជាំង

បានផុស

២ years មុន

នៅ

ថ្ងៃចន្ទ ១៥ មករា ២០២៤

ដោយ

ក្រោយជួបបញ្ហាការបន្តកើនឡើងនៃកម្រិតខ្យល់ពុលក្នុងទីក្រុង អាជ្ញាធររដ្ឋធានីហាណូយប្រទេសវៀតណាម បានអនុវត្តដំណោះស្រាយជាច្រើន ដើម្បីគ្រប់គ្រងបញ្ហានេះ ក្នុងនោះការបង្ការការដុតគល់ជញ្រ្ជាំងគឺជាចំណាត់ការអាទិភាពមួយផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពសារព័ត៌មាន Vietnam News បានឱ្យដឹងថា គណៈកម្មការទីក្រុងវៀតណាម បានចាត់ចែងរៀបចំឱ្យមានការពង្រឹងការចុះទៅពិនិត្យ និងណែនាំកុំឱ្យមានការដុតជញ្រ្ជាំងស្រូវ ពិសេសនៅក្នុងតំបន់នៅជិតផ្លូវធំ Highway និងតំបន់អាកាសយាន្តអន្តរជាតិ Noi Bai។

មន្ទីរធនធានធម្មជាតិ និងបរិស្ថានវៀតណាម ក៏បានរៀបចេញបញ្ជីនៃសង្កាត់ដែលមានអត្រាដុតគល់ជញ្ជ្រាំងច្រើន និងបញ្ជូនទៅរដ្ឋបាលទីក្រុងដើម្បីធ្វើចំណាត់ការ។ បន្ថែមពីនេះ មន្ទីរធនធានដដែល ក៏បានសហការជាមួយមន្ទីរកសិកម្ម និងអភិវឌ្ឍជនបទ មន្ទីរឧស្សាហកម្ម និងជំនួញ ដើម្បីជំរុញឱ្យមានអាជីវកម្មផ្សេងៗងាកទៅទិញគល់ជញ្ជ្រាំង ធ្វើជាវត្ថុធាតុដើម ដែលការណ៍នេះ នឹងនាំមកទាំងប្រសិទ្ធិភាពសេដ្ឋកិច្ច ហើយថែមទាំងជួយប្រើប្រាស់ឱ្យអស់គល់ជញ្ជ្រាំងក្រោយពេលប្រមូលផលស្រូវផងដែរ។

ទន្ទឹមនឹងនេះ មន្ទីរវិទ្យាសាស្រ្ត និងបច្ចេកវិទ្យាក្រុងហាណូយ ក៏បានដឹកនាំការសម្របសម្រួល ជាមួយមន្ទីរធនធាន ដើម្បីស្រាវជ្រាវ និងដាក់ចេញនូវបច្ចេកទេសសមស្របមួយ សម្រាប់ការប្រមូល ដឹកជញ្ជូន និងបម្លែងគល់ជញ្រ្ជាំងស្រូវទៅជា ផលិតផលមិនប៉ះពាល់ដល់បរិស្ថាន។

គួររំឭកដែរថា រយៈពេលប៉ុន្មានឆ្នាំចុងក្រោយនេះ រដ្ឋធានីហាណូយប្រទេសវៀតណាម ជាមួយការពង្រីក និងអភិវឌ្ឍបន្ថែមថ្មី ទីក្រុងមួយនេះបានក្លាយជាទីក្រុងលំដាប់ទី១៧ ធំជាងគេលើពិភពលោក តែទន្ទឹមនឹងនោះបញ្ហាអវិជ្ជមានមួយចំនួនក៏កើតមានស្របគ្នានោះដែរ គឺបញ្ហាបំពុលបរិស្ថាន និងអាកាសធាតុ។ បញ្ហាទាំងនោះ បង្កផលប៉ះពាល់ទៅដល់គុណភាពជីវិតរស់នៅ និងការអភិវឌ្ឍដោយចីរភាពជាទូទៅមិនថានៅទីក្រុងហាណូយ ឬបណ្តាក្រុងប្រជុំជនធំៗនានាលើពិភពលោកឡើយ ៕

អត្ថបទដោយ៖ មាន រតនា