តុលាការក្រុងឡាអេ សម្រេចបញ្ឈប់បញ្ជូនគ្រឿងបន្លាស់យន្តហោះចម្បាំង F-35 ទៅកាន់ប្រទេសអ៊ីស្រាអែល

នៅថ្ងៃចន្ទនេះ តុលាការរបស់ប្រទេសហូឡង់បានចេញសេចក្តីសម្រេច បញ្ឈប់ការនាំចេញគ្រឿងបន្លាស់យន្តហោះចម្បាំង F-35 ទៅកាន់ប្រទេសអ៊ីស្រាអែល ដោយសារមានការព្រួយបារម្ភថា គ្រឿងបន្លាស់ទាំងនោះអាចត្រូវបានគេប្រើប្រាស់ដើម្បីបំពានច្បាប់អន្តរជាតិនៃយុទ្ធនាការអ៊ីស្រាអែល នៅតំបន់ Gaza។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តុលាការក្រុងឡាអេបាននិយាយនៅក្នុងសេចក្តីថ្លែងការណ៍មួយថា “តុលាការបានរកឃើញថា មានហានិភ័យខ្លាំងណាស់ ដែលយន្តហោះចម្បាំង F-35 របស់អ៊ីស្រាអែល អាចនឹងត្រូវបានប្រើប្រាស់នៅក្នុងការប្រព្រឹត្តល្មើសធ្ងន់ធ្ងរនៃច្បាប់មនុស្សធម៌អន្តរជាតិ” ។

តុលាការបានបញ្ជាក់យ៉ាងច្បាស់ថា “ការនាំចេញគ្រឿងបន្លាស់ F-35 ពីហូឡង់ទៅកាន់អ៊ីស្រាអែលត្រូវតែបញ្ឈប់” ។

សូមរំឮកថា មានអង្គការមិនមែនរដ្ឋាភិបាលចំនួន៣ ដូចជា Oxfam Novib, Pax for Peace និង The Rights Forum បានប្តឹងឧទ្ធរណ៍ចំពោះសេចក្តីសម្រេចរបស់តុលាការហូឡង់ពីមុន ដែលអនុញ្ញាតឱ្យបន្តការនាំចេញគ្រឿងបន្លាស់ F-35 ទៅកាន់ប្រទេសអ៊ីស្រាអែល។

យ៉ាងណាមិញនៅថ្ងៃច័ន្ទនេះ សាលាឧទ្ធរណ៍ទីក្រុងឡាអេបាននិយាយថា ក្រោមបទប្បញ្ញត្តិអន្តរជាតិមួយចំនួនដែលហូឡង់ ជាសាមីប្រទេសត្រូវតែទប់ស្កាត់ការនាំចេញសម្ភារៈយោធាប្រសិនបើមាន “ហានិភ័យច្បាស់លាស់នៃការរំលោភធ្ងន់ធ្ងរនៃច្បាប់មនុស្សធម៌អន្តរជាតិ”។ តុលាការបាននិយាយថា អ៊ីស្រាអែលមិនគិតពិចារណាគ្រប់គ្រាន់អំពីផលវិបាកនៃការវាយប្រហាររបស់ខ្លួនសម្រាប់ជនស៊ីវិលនោះទេ ៕

ប្រែសម្រួលដោយ÷ ប៉ោ កុសល

ប្រភព÷ CNN